Resubelpara, Iaiong 21 : Ka sorkar ka dei ban buh ïaki centre ban pynlong ia ka Common University Entrance Test Examination ha man la ki Block ym tang ha Tura bad Shillong ong u MDC ka Rong Rong u Rinaldo K Sangma.
Ka National Test Agency ka la rai ba kino kino ki samla kiba kwah ban pule ïa ka BA, BSc, BCom ha ki College bapher bapher ki hap beit ban ïakhun ïa ka Common University Entrance Test khamtam ban ïoh rung ha ki University jongka sorkar pdeng, ong u Rinaldo Sangma MDC jongka Rong Rong, North Garo Hills.
Kumta u la ong “ Baroh ki College ha ka jylla ki dei kiba pynïasoh beit bad ka NEHU kaba dei ka Univeristy jogka sorkar pdeng bad kumta ki hap beit ban pynlong ïa kane ka Common University Entrance Test bad kiba pass ïa ka Class XII ki hap beit ban ïakhun ïa kane ka test ban ïoh rung ha ki college”.
Kumta ka sorkar ka dei ban plie noh ïaki centre ha man la ki block namar ka result ruh ka la jan mih. “ Ngi don da ki hajar ngut ki samla pule ha ka jylla bad ki don kiba wan na ki long ïing ba duk kiba ym lah ban ïoh bai kali ban wan shaduh Tura ne Shillong. Kumta kan jin da la bha lada ka sorkar ka buh ïaki centre ba kin ïaleh ïa kane ka test ha man la ki Block.
