Da ki tin sop ïing noh synñiang ka MCPF sha ki longïing ba shah pynjulor ‘erïong ha Umphrew

Shillong, ïaïong : Ka Mawlai Constituency Progressive Forum (MCPF), hynne ka sngi hapoh ka jingïalam jong u Bah Wanseng Jyrwa, Working President ka hiar sha ka shnong Umphrew ban noh synñiang da ki tin sop ïing sha ki santylli ki longïing ki ba ki ïing ki sem ki jong ki, ki la shah pynjulor noh ïa ka ‘erïong ka ba la wan syllad ïa kane ka shnong ha ka 14 tarik mynta u bnai.
Ha ba kren ha ka jingïalang ka ba lyngkot na ka liang u Bah Wanseng nyngkong eh u la pynpaw ka jingsngew nguh ïa u MLA ka thaiñ u Bah PT Sawkmie u ba la wan jurip sha kane ka jaka hadien jong katei ka jingjia ba sngewsih da ka ba kular ruh ban aijingïarap mardor sha kine ki longïing.
Une u nongïalam ka MCPF u la pynpaw ruh ka jingkmen halor ka jingshim khia jong ki nongïalam shnong ha ka ba ïadei bad ki jingeh jong ki nongshong shnong bad halor ka jingïa treilang ka ba ki la ai bad kane ka seng kumjuh bad u MLA ka thaiñ.
Na ka liang u Rangbah Shnong u Bah D.Sohshang ruh ha ka jingkren u la pynpaw ka jingsngew nguh ïa kane ka sienjam ba la shim da kane ka seng kumjuh ia u MLA ka thaiñ u ba la ju ïarap ha ka ba ïadei bad ki ba bun ki jingeh ki ba kum ka shnong ka ïakynduh na ka por sha ka por.
Kumjuh na ka liang jong I Kong J. Marbaniang i ba dei iwei napdeng kine ki nong ïoh jingïarap ha ka jingkren i la pynpaw ka jingsngew nguh ïa kane ka seng khamtam ïa u MLA ka thaiñ u ba la shim khia ha ka ba ïadei bad kane ka jingeh ka ba ki la ïakynduh namar ka jingshah pynjulor jong ki ïing ki sem.
Ha kane ka sngi la ïa don lang ruh u Bah F. Langstieh Secretary Shnong, Rangbah Shnong barim, ki longïing ki ba la ïoh ïa kane ka jingïarap, u Bah A.Lyngdoh Secretary ka MCPF Youth Wing kynthup ïa ki dkhot jong ka nalor kiwei kiwei pat.