Wat ju ngeit biej ïa ki jingpynthame ki Kobiraij, kyntu u MLA Nongstoiñ

Nongstoiñ, Ïaïong, 21: Kum shibynta ban pynsngewthuh ïa ki paitbah kumno ba kin sumar ïalade, khnang ban lait na kiba bun jait ki jingpang jingshitom, ka tnad ka koit ka khiah jong ka West Khasi Hills ha ryngkat ka jingïatrei lang bad ki Doctor jong ka Nongstoiñ Civil Hospital, ki Nurse, ki ASHA, ki Anganwadi Workers, ki nongtrei ha ki Health Wellness Centre bad Sub Health centre, mynta ka sngi ki la pynlong ïa ka Health MELA ha madan jong ka Joel Gatphoh Memorial Higher Secondary School Nongkynjang, ha kaba da ki spah ngut ki paitbah ki la tuid sha katei ka madan na ka bynta ban sngap ïa ki jinghikai bad ki jingpynshai na ki Doctor bad ki nongtrei ka koit ka khiah.
Ha kane ka sngi nalor ki paitbah jong ki shnong kiba don ha katei ka thaiñ, la ïadon ryngkat ruh da u MLA ka Nongstoiñ Constituency u ba la shah khot kum u kongsan. La pynïaid jingialang da u Doctor Tylliborlang Syiem, ha kaba kiwei pat ki ophisar jong ka tnad ka koit ka khiah ba kynthup ïa I kong B.Nengnong CDPO West Khasi Hills, u Doctor W.Sutnga Junior Specialist Nongstoiñ Civil Hospital, U bah R.Kharkongor EAC West Khasi Hills, u Pastor P.B Kharbani Principal ka Joel Gatphoh Memorial Higher Secondary School, ki sordar jong ki shnong ba marjan bad kiwei kiwei ki riew rangbah ki la ïa donlang.
Na ka liang u nongmihkhmat haba kren kum u kongsan, u la kyntu ïa ki paitbah ba haba ki don kino kino ki jingshitom, ki dei ban leit bran bran sha ki Doctor kiba la ithuh da ka sorkar bad kim dei ban ngeit biej ne shah pynthame ha ki Doctor kobiraij ki bym tip ei ei shaphang ka jingkoit jingkhiah. U la bynrap ruh ba ki paitbah ki dei ban kiar na ki jingshah ïalam bakla ha kino kino ki briew ha kiba pynsngewthuh bakla ha ki bun rukom. Na ka liang u MLA u la sam ruh ïa ki khusnam sha ki nongtrei ha ki HWCs kiba don ha ka District kum ka jingpynshlur na ka bynta ka jingtrei shitom jong ki.