Shah ktah palat 10000 ngut, palat 2300 ki ïing, ïap 4 na ka erïong bad phria ha Jylla

Shillong, Ïaiong 20: Haduh 4 ngut ki briew kila ïap bad palat 10,000 ngut ki Nongshongshnong ka Jylla kila shah ktah jur na ka jingwan lynshop jong ka eriong bad u phria ha Jylla ha kine ki artaiew bala leit noh.
Arngut na kine kiba ïap ki dei ha East Khasi Hills bad arngut ha South Garo Hills District.
U Myntri ka Tnad Revenue & Disaster Management ma Kyrmen Shylla u pyntip ba haduh 10,263 ngut ki nong shongshnong kila shah ktah jur ha ka jingwan lynshop ka eriong bad u phria bad haduh 2359 tylli ki Ïing kila julor ba kynthup ïa 2199 tylli kiba julor malu mala bad 160 tylli kiba la julor klai bha.
U Myntri u pyntip ba haduh 4 ngut ki briew kila ïap ha kane ka jinglynshop ki bor ka mariang bad 2 ngut pat kila mynsaw.
Haba ai jingkheiñ ïa ki jingjulor, u Myntri u pyntip ba ha East Khasi Hills, haduh 14 tylli ki Ïing kila julor na ka eriong kaba la khie ha ka 15 tarik Ïaiong 2022 ba kynthup ïa 12 tylli ha Mawlai bad 2 tylli ha ki thaiñ jong ka Shella Bholaganj Block/ Pynursla Block.
Ha West Khasi Hills, haduh 724 tylli ki Ïing kila shah pynjulor ha ka eriong kaba khia ha ka 17, 18 bad 19 tarik Ïaiong bad kine ki ïing ki kynthup ïa 27 tylli ha ki thain Nongstoiñ bad 697 tylli ha ki thain Nongstoiñ bad Mawshynrut Block.
Ha Eastern West Khasi Hills, haduh 695 tylli ki Ïing kila julor na ka jinghap khria ha ka thaiñ Mawthadaraishan kaba jia ha ka 17 bad 18 tarik Ïaiong. Ha South West Khasi Hills, tang kawei ka Ïing phlang kala julor na ka jingrah ka lyer kaba jia ha ka 15 tarik.
Ha Ri-Bhoi District, haduh 47 tylli ki Shnong jong ka Umsning Block bad 29 tylli ki Shnong jong ka Bhoirymbong Block, kila shah pynjulor ha ka eriong kaba jia ha ka 14 tarik Ïaiong.
Ha East Jaiñtia bad West Jaiñtia Hills, tang saw tylli ki Ïing kila julor ha East Khasi Hills ba kynthup ïa ka Anganwadi Centre ha Wapung, kaba la shah rat ka tnum na ka eriong ba lynshop ha ka 6 tarik Ïaiong. Ha West Jaiñtia, haduh 6 tylli ki masi kila ïap na ka jingpom pyrthat kaba jia ha ka 15 tarik.
Ha West Garo Hill, ka eriong kala lynshop ha ka 6 tarik haduh 17 tarik bad ha kine ki jingjia haduh 19 tylli ki ïing kila julor ha Dalu Block, 44 tylli ha Trikikilla Block bad kawei ha Tura.
Ha North Garo Hills, 65 tylli ki Ïing kila julor ha Kharkutta Block ha ka jingkhie ka eriong ba jia ha ka 14 tarik. Kumjuh ruh ha ka 15 tarik, sa166 tylli ki Ïing kila julor ha Kharkutta bad ha Resubelpara Block bad ha ka 17 tarik pat sa 87 tylli ki Ïing kila julor ha Kharkutta, Resubelpara bad Bajengdoba Block.
Ha South Garo Hills, haduh 64 tylli ki Ïing kila julor na ka jinglynshop u phria kaba jia naduh 12 tarik Ïaiong haduh ka 18 tarik Ïaiong bad kine ki Ïing ki dei kiba na Chokpot bad Rongara Block. Ha kane ka District, uwei u briew ula ïap na ka jingngam jyllop.
U Myntri ula kyntu ïa ki Nongshongshnong ka Jylla ba kin phikir bha ïalade mynta ka lyiur ba jur slap bad ong ba kum kine ki jingpynjulor ka mei mariang ki dei ki ju jia beit manla u snem haba kyrpad ïa ki paidbah ba kin long kiba husiar bha.