La pynkhreh ïa ka Blueprint ban pynkylluid ïa ka nongbah Shillong: Prestone
![](https://mawphor.com/wp-content/uploads/2022/04/preston-720x430.jpg)
Shillong, Lber 24 : U Bah Prestone Tynsong, Symbud Myntri Rangbah uba peit ïa ka tnad pohïing u la ïathuh ba ka sorkar kala pynkhreh ïa ka Blueprint ne ka Plan ban weng ïa ka jingkhapngiah ka Sor Shillong bad ruh ban pynduna ïa ka dheng kali.
Haba jubab ïa ka jingkylli ba la wanrah da u Bah Charles Pyngrope, MLA ka Nongthymmai, u Bah Prestone, u la ong ba ka Sorkar kala leh ïa ka Technical Study, nangta ka Integrated Network Planning bad kiwei kiwei ban lap ïa ki daw jong ka jingkhapngiah.
Shuh shuh u Myntri, u la ïathuh ruh ba ka Sorkar kala thaw ïa ka Committee jong kiba bun ki tnad treikam kaba la khlieh da u Chief Secretary bala ai kyrteng ka Shillong Decongestion Committee, ka ban peitngor ïa ka jingiaid jong ka kam.
Kane ka Committee kala pynlong bunsien ki jingialang ban peit thuh ïa ka jingïaid ka kam.
Ka Sorkar Jylla kala shim ruh ïa ki jingai jingmut na ki jaka pule bad Tnad ba paw kum ka IIM Shillong, NIT Shillong bad ka North East Space Application Centre (NESAC).
Katto katne na ki sienjam bala shim da ka Sorkar ka dei ka jingwanrah ïaka jingpyndonkam da ki Bus na ka bynta ban kit ïa ki khynnah skul.Lyngba kane, u Myntri u la ïathuh ba la kheiñ antad ba kumba 450 tylli ki kali kin lait na ka jingmih sha surok ha ka por leit buh bad shaw skul.
Nangta la mang pisa ruh 25 klur na ka bynta ki lynti ban ïaid na jrong suiñ ne ki sky walk ki ban ïaid na Barik Point sha Khyndailad.
Ula ong ba ka Sorkar kala buh hakhmat eh ban kyntiew kyrdan ia ki jaka pynïeng kali bad ki surok ban lah pyndonkam kat kum ka jingdawa. Ula iathuh ba ïa mynta, palat 300 tam ki jaka ban pynieng kali la nang pynbun hapoh ka Nongbah.
Haba iadei bad ka sienjam ba hadien habud, u Symbud Myntri rangbah ula ong ba ka jingshna ïa ka surok Shillong Western By-pass bad ka jingpynheh ia ka Shillong Eastern By-Pass bad kiwei kiwei ki surok, kin sa nang iarap ban pynduna ia ka jingkhapngiah.
Ula ong ba ka Sorkar Jylla kala rai ban pynkynriah ia ki Ophis treikam sha ka New Shillong Township ha kaba baroh ki Ophis Sorkar kin sa don noh ha kane ka jaka. Kane kan iarap ban pynduna ia ka jingdheng kali ha kane ka sor.