Jowai, Ïaïong 19: Ka lympung ïalehkai phutbol ba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la pynïaid da ka West Jaiñtia District Sports Association (WJDSA) kaba la long mynta ka sngi 19 tarik u Ïaïong ha madan Kiang Nangbha Stadium Jowai.
Ha ka jingïakhun ba nyngkong na ka liang ka kynhun ïalehkai jong ka Pasyih Cultural Sports Club kala jop da 3-1 kol pyrshah ïa ka Iooksi Youth Welfare bad ïa katei ki kol na ka Pasyih Cultural SC la theh da u Shining Rymbai haka minit ba 9, u Chaniah Dkhar haka minit ba 21 bad u Phem Dkhar ha ka minit ba 40. Ïa ka shikol na ka Iooksi Youth Welfare la theh da u Tympang Tangliang ha ka minit ba 75.
Ka jingïakhun ba ar kala long hapdeng ka Mookynphad Mihmyntdu pyrshah ïa ka Risingsun Mukhla, ka kynhun ïalehkai jong ka Risingsun Mukhla kala jop da 3-1 kol, ïa ki kol jong ka la thep da u Rimi Pyrtuh haka minit ba 11 & 58 bad u Disfiveboy Nongrum ha ka minit ba 23. Ïa ka shikol na ka Mookynphad Mihmyntdu la theh da u Arwan Rymbai ha ka minit ba 61.
Katba ha ka jingïakhun kaba lai ka khunhun ïalehkai jong ka Nonglatem ka la jop da 1-0 kol ïa ka Mukhla Umlangshor bad katei ka shi kol la thep da u Tommy Lamare ha ka minit ba 69.
Ka jingïakhun lashai ka sngi 20 tarik kan long hapdeng ka Mookaswan Dongwah pyrshah ïa ka Madankynsaw Mookyndeng ha ka por 11 baje mynstep, ka Samaro FC pyrshah ïa ka Maitchaphrang Mootyrshiah ha ka por 1 baje nohphai sngi bad ka Loompyrdi Iongpiah pyrshah ïa ka Madan Thadmuthlong haka por 3 baje janmiet.
