Nongstoiñ, Ïaiong 19: Ka Thomas Jones 1 Secondary School ka la rakhe ïa ka jingdap 50 snem kynthih mynta ka sngi naduh ba la seng nongrim ïa ka da ka Balang Presbyterian Pyndengrei, Nongstoiñ.
Lah ban pynkynmaw ba la plie nyngkong eh ïa ka Pyndengrei School ha ka 15/2/1972, da ki Khristan kiba don tang kumba 14 lane 15 ïing hapoh ka jingïalam u Tbn W.Pariong. Ki khynnah skul ha kata ka por ki don tang 5 ngut bad la siew tulop 15 tyngka uwei u nonghikai da ka Balang bad khlem shim bai skul da ki bun snem.
Hadien pat la shim tang kaba rit ban ïa nujor bad kiwei pat ki skul. Hadien pat la kyntiew kyrdan ïa ka kum shibynta ïa ka jingdap 150 snem ha ka snem 1991 ka jingwan ka Gospel. La kyntiew sha ka Secondary kum shibynta ïa ka jingïaid ïa ka spah snem ba 20 ne 20th century. Ka jingsiew tulop ka long kaba rit bha ha ka jingïaid lynti.
Dei haduh u snem 1994 ba la siew ka sorkar bad mynta 3 ngut nonghikai LPS Defisit, Iwei Sdhoc bad 4 ngut ïa ka Adhoc bad ïa ka Secondary dang siew beit da ka Balang. Baroh kiba siew da ka Balang naduh LPS haduh Secondary ki long 10 ngut. Ïa ka school building la ïoh jingïarap na ka sorkar lyngba ki nongmihkhmat kiba la leit bad mynta na ka tnad pule.
Haba ai jingkren kum u kongsan ha ka jingrakhe ïa kane ka sngi kyrpang, u Bah Lahkmen Rymbui, u la ong ba katkum ba la ïoh sngew na ka histori lyngkot la ong ba ki 15 tylli ki longïing da ka jingïatylli bad jingangnud ban ai jingnang jingstad ïa ki khun ki kti ïa ka imlang sahlang ki la la lah ban seng ïa kane skul bad la ïoh ruh ban rakhe ïa ka jingdap 50 snem
U la ong ruh ba ka MC ka ïakynduh jingeh naduh ba sdang haduh mynta, hynrei hapdeng ki jingeh, sngew tynnad ba ka MC ka la ïaid shaprang ban kyntiew kyrdan ïa ka skul bad angnud ban kyntiew sa sha ka Higher Secondary.
“Ngi long ki briew kiba im lyngba ka jingkyrmen bad dei lyngba ka jingkyrmen kaba btin lynti bad ai mynsiem ïa ngi bad ka mon ka dei ka shalyntem ban poi sha ka thong kaba ngi thmu. Nga kwah ban kyntu ïa ka MC ba ai ba kine ki mawmer ba 50 tylli kin nang pynkhlaiñ ïa ka jingangnud na ka bynta ban kyntiew kyrdan ïa ka skul”, u la ong.
“Ngi na ka liang ka sorkar ngi don ka jingangnud ban kyntiew ïa ka pule puthi bad ka jingïaid shakhmat ka la ïaid haba bun ki liang. Hynrei ki sohkyrdot ka dei namar ka jingbun palat ki kyrdan jong ki nonghikai, ka jingsiew ha kawei ka skul ki don saw jait san jait. Ta ka daw kam long kaba suk hynrei ngi don ka jingkyrmen ban jop ïa ki jingeh wat hapdeng ki jingeh bad ngin leh ïa kaba bha tam”, u la ong.
Kiwei kiba la donlang ha kane ka jingïalang ki kynthup ïa u MLA Bah Macmillan Byrsat, Bah P.D Sangma Deputy Commissioner, ki heh sorkar ka tnad pule, ki nonghikai, ki nongïalam ka Managing Committee bad kiwei kiwei ki riew heh.
