Shillong, Rymphang 22 : Ka Shillong All Faiths Forum (SAFF) mynta ka sngi kala kyntu ïa ki para ba ngeit ban pyndonkam hok ïaka hok ban thep Vote ka ban long haka 27 tarik mynta u bnai bad ban jied ïaki nongïalam kiba sheptieng ïa U Blei bad kiba don ka mynsiem ban shakri hok ïa u paidbah.
Ka kyrwoh bala wan na u president ka SAFF u Bishop P. Lyngdoh ka kyntu ruh ïaki paidbah ban ban kiar na kino kino ki kam sniew, ban kiar na ka jingshah pynbeij haka bor pisa bad ban leit thep Vote daka jingkynmaw ïa U Blei bad da ka jingkhuid jingsuba naka bynta ka bha ka miat jong baroh bad ka jylla baroh kawei.
“Lada ki paidbah kim ngop haka bamsap bad ki pyndonkam hok ïaka hok ban thep Vote ka jylla ruh kan ïoh ïaki nongïalam ki bym ngop ha ka bamsap bad kane kan wanrah jingbha ïaka jylla baroh kawei khamtam haba ïadei ban kyntiew ïa ka roi ka par hapoh ka jylla bad dei namar kane ki paidbah ruh kidei ban tip briew tip Blei haba ki leit ban thep Vote” la ong ka kyrwoh.
U Bishop P Lyngdoh ula ong ba ki nongïalam jong ka jylla ki don ka bynta ban leh naka bynta ka bha ka miat ki paidbah ka jylla Mgehalaya bad ka ri India baroh kawei naka bynta ban kyntiew ïaka bha ka miat.
“Kum ki briew ba tip briew tip Blei, ngi donkam ban pan bor na U Blei ban ïalam lynti ïa ngi ban leh naka bynta ka bha ka miat jong baroh” ula ong.
