Syllad u Phria bad lyer ha thaiñ Rambrai bad Kynshi, julor ki ïing bad ki jingthung

Nongstoiñ, Ïaiong 17: Ha ka miet sngi saitjaiñ, u phria ryngkat ka lyer kaba jur bha u ka syllad ïa kiba bun ki shnong ha West Khasi Hills, kat haduh ba ka la wanrah ïa ka jingjulor jur jong ki ïing ki sem bad ki jingthung jingtep.
Ki tyllong khubor ba la ïohlum hynne ki ïathuh ba ki shnong kiba don ha ka thaiñ Rambrai ki la shah ktah bha na kane ka jingther phria. Kat haduh ba thoh ïa ka khubor, la ong ba ki shnong kiba shah ktah eh ki long ka RL iew Rambrai, Mawrang, Umsiej, Nongkroh Phodumbah bad kiwei pat ki shnong ba marjan.
La ong ba kiba bun ki ïing ki sem ki la julor jur na ka jingther phria, ha kaba ki tnum ïing ki la pei thliew lut bad don ruh ki tin kiba la shah rong ha ka lyer. Nalor nangta, la ong ba ki jingthung jingtep kiba dang khie lung kum u riewhadem, u phan bad kiwei ki jait jhur kiba don ha ki kper ki phrah, ki la julor lut.
U Bah Jistarlan Lyngkhoi u la ong ba ym lah ban tip satia haduh katno ki shnong bad haduh katno ki ïing kiba la shah ktah. Hynrei, u la ong pat ba khambun na ki shnong kiba don ha ka thaiñ Rambrai ki la shah ktah haduh katta katta na kane ka jingther phria ïa ki ïing ki sem bad jingthung jingtep.
Kynshi: Bun tylli ki ïing ki la julor ki tnum ha Shnong Nongriat, West Khasi Hills District namar ka jinghap u phria ba jur ha ka Sngi Saitjaiñ mynmiet.
U Sordar jong ka Shnong, u la ïathuh ba la jan baroh ki ïing kiba sop da ka tin ki la pei thliew namar u phria uba hap ruh udei uba heh ba heh, ha kaba la antad ba u don uba heh haduh 2 ne 2 inshi shiteng ruh.
Ka jinghap u phria ka la jia ha ka por 11 baje mynmiet.
Nalor ka Shnong Nongriat, ka Shnong Domkohmen ruh ka la shah ktah ha kane ka jinghap phria.