Shillong, ïaïong, 17: U Myntri ka tnat C&RD u Bah Hamletson Dohling ha ka sngi Saitjaiñ u la plie paidbah ïa ka Water Conservation Tank ha ka shnong Mawnianglah, East Khasi Hills.
Haba kren ha kane ka sngi, u Bah Hamletson u la ong ba kane kan long ka sngi kaba kmen tam ïa ki paidbah jong kane ka shnong kiba la ap khmihlynti la slem ban ïohi ba la plie paidbah ïa kane ka top pynlang um.
U la ong ba na kane top pynlang um yn sa sam ïa ka um sha ki paidbah ym tang ban sum ban sait hynrei ban bam ban dih.
U la ïaroh ïa ki paidbah kiba la ai ka jingïatreilang ban ai jaka bad ban ïatreilang bad ka tnat PHE khnang ban dup pyndep ïa kane ka projek ha ka por kaba biang.
Lah ban kdew hangne ba ïa kane ka top um la shna ha ka jinglut kaba T. 17.50 lak lyngba ka District Mineral Fund bad ka um ka lah ban ngiam ha kane ka top ka long haduh 148420 litar.
Kiwei kiwei kiba la don lang ha kane ka sngi ki kynthup ïa u BDO jong ka Mylliem C&RD Block u Bah P.T Passah, u Rangbah Shnong ka Mawnianglah u Bah S Kharkongor bad kiwei kiwei.
