Shillong, ïaïong: Ka ‘Erlangthari kyndit kynsan ka la wan bad ka la lied bad rong ïa ki tnum jong ki katto katne tylli ki ïing ha shnong Umphrew, ka shnong kaba markhap bad ka Umroi constituen cy, Ri Bhoi District, kaba dang hap pat hapoh u pud u sam jongka Mawlai konstitwensi.
Katkum u Rangbah shnong ka Umphrew u bah D. Sophshang u la ïathuh ba kane ka la jia ha ka 14 tarik u Ïaïong jong ka sngi Palei, ha ka por kumba 12 shiteng baje eiei.
U ïathuh ba ka tnum ïing jong ka kong Anita Kharbangar ka la shah rat bad shah rong ha kane ka lyer kaba jur bad kane ka tnum ka la leit hap pat ha ïing jong ka para jong ka, kaba don marjan bad ka ïing jong ka. Haba ïa dei bad kane ka jinghap kane ka tnum kane ka ïing jong ka para jong ka ruh ka la julor lang.
U ïathuh ruh ba ka don sa kawei ka ïing kaba la shah ban ha u dieng ba la khyllem halor jong ka. “Ki don ruh sa kiwei ki tnum ïing kiba la shah lied na kane ka lyer kaba jur kaba la wan kyndit kynsan bad ki don ruh ki sem masi bad sem sniang ba la shah pynjulor na kane ka bor mariang,” ong u rangbah shnong.
Ki la don bun bha ki ïing kiba la julor, hynrei kiba la kham julor ki don phra tylli, bynrap u bah Sohshang. U la ai khublei bad pynpaw ruh ïa ka jingsngewnguh ïa u MLA ka Mawlai u Bah Process T Sawkmie u ba la shimkhia ban wan khmih ïa kine ki jingjulor hadien ba u la pyntip sha u.
Hadien ba la dep khmih da la ki jong ki khmat ïa ki jingjulor u MLA u la ai jingïarap da ka song pisa sha ki phra tylli ki longïing naka bynta ka jingdonkam kyrkieh jong ki.
U pyntip ruh sha ki ba un sa pynpoi sa ïa ki tin sop ïing ha ka sngi baar na ka bynta kiba la shah pynjulor ki tnum ïing.
U ïathuh ruh ba ka leit dei ka Good Friday hynnin ka sngi, kumta u la wan noh mynta ka sngi Saitjaiñ ban ïakynduh ïa ki longïing kiba la shah pynjulor.
U MLA u pyntip shuh shuh baka ophis jong ka Deputy Commsionner ka East Khasi Hills District ruh kan sa ai jingïarap ïa ki haba ïa dei bad kane ka jingshah pynjulor.
