Shillong, Iaiong 15 : U General Secretary ka UDP, Dr. Jemino Mawthoh u la kam ba ki nongïalam jong ka UDP kim shym la ngop satia ha ki jingshah pynbiej ba harukom kiba wan na kadiang bad kamon ban leit ryngkang noh sha kiwei ki party hynrei ki ïeng skhem beit ha ka nongrim ba ki don.
“Katno ka long kaba sngewtynnad ban ïohsngew na ka shyntur jong ki haba ïadei bad ka party jongngi. Ngi ïohi ruh ïa ka jinglong skhem jong kine ki rangbah nongïalam jong ka party ba naduh ba ngi rung ha ka party watla ka don kata ka jingtyrwa na shane na shatai hynrei ngi khlem khih sha kadiang ne sha kamon hynrei ngi ïeng skhem beit ban don ha kane ka party,” ong u Dr. Jemino haba kren ha ka jingïalang pdiang burom ïa ka kynhun ba thymmai jong ka UDP Mylliem constituency kaba long ha kane ka sngi Palei ha Lawsohtun.
Utei u nongïalam ba hakhmat eh ka UDP u ong ruh ba kum ka party ki sngew sarong ba ka party ka don ïa kum kitei ki nongïalam kiba skhem ka jingmut bad ki ba thrang ban trei na ka bynta ka party.
Shuh shuh u ong ruh ba dei da ka jingdon jong kum kitei ki nongïalam ba ka party ka la kiew stet bha mynta namar nalor ba ki skkhem ka nongrim ki dei ruh ki rangbah kiba ïohi jngai, kiba shemphang bad kiba buh shwa ïa ka ishu jong ka Jaidbynriew ha khmat.
U Dr. Jemino u la ïathuh ruh ba kumba long mynta, bun ki riew pawkhmat, ki riew shemphang bad ki riew donburom ki la phai khmat lut sha ka UDP na bynta ka elekshon ban wan.
Haba kren pat hadien ba la wai ka jingïalang, u la ong, “Ki don bun ki ban wan bad ngi, shu ap tang ia ka por kaba biang.”
Watla utei u heh UDP u kyntait ban ïathuh ïa ki kyrtong kiba kham paw kiba kwah ban iïkhun na ka party ha kane ka elekshon khamtam eh na East Khasi Hills hynrei la sngewthuh ba ki kyrtong kiban aireng ha u 2023 dei ki kyrtong kiba la paw lypa ha ki kam ki kam ba ki trei. Kitei ki kyrtong kin kynthup naduh ki MLA bad MDC kiba jop ha ka elekshon ba la dep na kiwei ki party, nanngta ki ophisar ba la shongthait, ki MLA/Minister ba rim bad kiwei kiwei.
