Ym tang ha Nongthymmai hynrei ha baroh kawei ka jylla ngin poi sha ka thong: Charles Pyngrope

Shillong, Rymphang 06: U President jong ka All India Trinamool Congress (AITC) ha ka jylla uba dei ruh u kyrtong jong ka na Nongthymmai Constitunecy u Bah Charles Pyngrope u ha ka sngi Nyngkong u la kob ba ka party kan poi sha ka thong ym tang ha Nongthymmai hynrei ha baroh kawei ka jylla bad ba kan ïoh thaw ruh ïa ka sorkar hadien ka elekshon
Haba kren sha ki lad pathai khubor hadien ka jingwan thep kyrteng, u Bah Charles u la ong ba kum u kyrtong u la pynkhreh bha bad lyngba ka jingkyrshan ki paidbah u dang kyrmen beit ba un wanphai biang kum u MLA ka Nongthymmai bad ruh kum u Presidnet ka party u la bud dien bha ïa ki kam ka party ha baroh kawei ka jylla ban pynthikna ba ka party kan ïoh bat ïa u lakam synshar.
U Bah Charles u la ther tyngeh ïa ka National People’s Party (NPP) kaba la kynnoh ba ka skhim WE bad MYE Card kadei Baki Card ne ki card tang shynrong khlem treikam eiei, da ka ong ba ha West Bengal ruh kine ki skhim ki treikam bad ki seisoh bha bad na ka liang ka AITC kan leh kumjuh ha Meghalaya lada ka wan haka bor hadien ka ilekshon.
U la ong “Ïa ka ba mynta ka AITC kam pat don ha ka bor, ym dei ban kynnoh ba ki skhim WE bad MYE Card kidei ki skhim elekshon, dei ban kynnoh hadien ba ngi wan haka bor bad lada ngim lah pyntreikam ïa kine ki skhim”, u la ong.
Haba ïadei bad ka jingkynnoh jong u Conrad ba ma u lem bad u Dr. Mukul Sangma kin mih noh naka AITC ban ïasoh shaka BJP tang hadien ka ilekshon, u bah Charles ula ong ba ki jingkynnoh kin sah ki jingkynnoh namar ka dei ka jingkynnoh ba lamler suda ban ïalam bakla ïa u paidbah ka ri.