Kynduh ka KSU bad SRS ïa ki Heh District ka Ri Bhoi ba kem ki Pulit Assam ïa 3 ngut ki samla

Nongpoh, Ïaiong 15: Ka KSU bad ka Synjuk ki Rangbah Shnong Border Area jong ka Raid Nongtung ha Block II ha ka sngi Palei ki la leit ban kynduh ïa u DC ka Ri Bhoi bad kumjuh ruh ïa u SP ka Ri Bhoi, na ka bynta ban ïa kren halor ka jingshah kem ki 3 ngut ki samla Khasi na ka shnong Sabuda ha ki Pulit ka Assam.
Kine ki nongïalam ka KSU ba la lamkhmat da u President, u Samla Ferdynald Kharkamni bad u Bah Blikshong Sohtun, President ka Synjuk, ki la leit ruh ban ïa kynduh ïa u DC ka Ri Bhoi, u Arpit Upadhyaya bad ïa u SP ka Ri Bhoi, u Giri Prasad, ka dei halor ka jingsngewkhia ba ki Pulit ka Assam ki la shu kem khlem nongrim ïa kitei ki 3 ngut ki samla ka shnong Sabuda na Umpaklong da kaba kynnoh ba ki thmu ban thang ïa ka jingkieng Umler bad kane ka dei tang ka jingkynnoh ki Pulit ka Assam ba kitei ki samla kim don kti satia ban leh ïa kitei ki kam beain.
Halor kane ka jingleit kynduh ïa u DC bad SP ka Ri Bhoi la don ryngkat ruh u Bah Brom Surong na ka shnong Khliehumwang uba la sakhi ba kitei ki samla kim don bynta ei ei ban leh ïa ki kamm sniew bad shuwa ba kin shah kem kitei ki samla ki dang wan iarap ban khynniat ïa ka kali jong u kaba sniew ha Umpaklong bad kim shym la don kano kano ka kam ban leh ïa ki kam sniew bad kine ki samla ki dei kiba ym ju don dak ruh ban leh ïa ki kam sniew.
Na ka liang ka KSU bad Synjuk, ki la pynsngew sha u DC bad sha u SP ka Ri Bhoi ba ki hap ban shim khia halor kane ka ka jingshah pharep kitei ki samla ba la shah kem ha ki Pulit ka Assam, namar ki Pulit ka Assam hi na ka por sh aka por ki ju pyndik tang ïa ki Khasi da kaba shu pharep klumar khlem ka jingshisha bad kane ka jingjia kam dei shuh ka jingjia ba tang shisien bad la jia bunsien ki briew kiba lui lui ki ju shah pharep ha ki Pulit ka Assam tang shu don kano kano ka huri hura ha katei ka shnong khappud ba hap ha ka thain Block II ha Ri Bhoi District.
Kaei kaba la pynsngew da ka KSU bad na ka liang ka Synjuk sha u DC bad SP, ka long ban shim khia halor katei ka jingshah kem ki lai ngut ki nongshong shnong ka Sabuda, kaba ki la shah kem tang na ka daw ka jingmih ka huri hura na ka shnong Jatalong kaba dang shu jia dang shen bad ki la kyrpad ruh ba ka bor District na Ri Bhoi ka dei ban ïa kren bad ki bor District ka West Karbi Anglong ba kin pynphai noh ïa kitei ki samla sha ki bor district ka Ri Bhoi bad lada ki la leh ïa ki kam sniew kumba la kynnoh da ki Pulit ka Assam dei ban tohkit da ki Pulit ka Meghalaya.
Shuh shuh, na ka liang ka KSU bad na ka liang ka Synjuk ki la dawa ruh ba ka sorkar Meghalaya ka dei ban shim khia halor kane ka bynta da kaba ki la dawa ba dei ban pynlong lang ka jingtohkit da ki Pulit ka Meghalaya halor katei ka jingkynnoh ki Pulit ka Assam, namar katei ka jaka ka dang hap ha ka jingïakajia pud hapdeng ka Assam bad Meghalaya ki Pulit ka Assam ki dei ban shu leh don bor namar ïa kano kano ka kam ruh dei ban don lang kajingtip na ka liang ka Meghalaya bad na ka Assam bad kumba la jia ha katei ka sngi pat ki PUlit ka Assam ki la shuh kem ïa kitei ki samla da kaba shu pharep khlem da don ka jingshisha, pynpaw ki nongïalam ka Synjuk bad ka KSU.
Shuh shuh, ka liang ka KSU North Khasi Hills District ki la dawa mardor na ka sorkar Meghalaya ba ka hap ban shim khia halor kane ka jingshah kem kitei ki lain gut ki samla bad dei ban pynlong lang ka jingtohkit da ki pulit ka Meghalaya bad kim lah ban shaniah tang ha ki pulit ka Assam, namar kane ka jingjia bunsien hi lada don kano kano ka huri hura kiba kylla langknia ki dei ki paid Khasi ba ki Pulit ka Assam na ka por sha ka por ki la ju leh ïa ki kam thombor pyrshah ïa ki Khasi, ong u nongïalam ka KSU, u Samla Ferdynald Kharkamni.