Kylla nonghikai skul ki nongshet ja sngi ïa ki khynnah skul ha ka por bym don khaw

Nongstoiñ, Ïaiong 15: Ki nongshet ja mid day meal ha ki skul bapher bapher kumba la thung da ka sorkar, ki la pynpaw ka jingsngewkhia kaba jur halor ka jingshah ban beiñ ha ka sorkar. Kata nalor ba ki hap shet ja ha ki skul, hynrei ki la hap ruh hikai ha ki kamra class ha ka por bym don khaw.
Lah ban pynpaw ba kiba bun na kitei ki longkmie, kiba dei tang ki nongshet ja bad ki dei ki bym pat pule jngai te lada ma ki kin hikai ïa ki khynnah kaei keiñ ka ban jia ïa ka lawei ki khynnah skul. Katto katne na kine ki longkmie haba ïakren bad u nongthoh khubor ki la pynpaw ka jingsngew bynñiaw kaba jur halor kane.
“Ka jingnang jingstad ka long kaba donkam bha, hynrei ngi donkam ruh ban tip ïa ki aiñ ki kyndon. Lym kumta khlem ka jingtip kaba bniah bunsien ngi kum ngat ha ka jingshah ïuhroit. Ïa kane ngi lah ban pynshisha lyngba ka jingjia ïa ki katto katne ngut ki longkmie, kiba trei kum ki nongshet ja ïa ki khynnah skul kiba kynthup na ka West Khasi Hills District bad na Eastern West Khasi Hills District”, ong kawei na ki longkmie kaba la ud bad ong ruh ba ki don ha la ki jong ki jong ki jingeh kaba ki mad ha ka kam kaba ki trei.
Ha ka jingïakren bad u nongthoh khubor, iwei na kine ki longkmie I bym kwah pynpaw kyrteng ïalade I la ong, “Ïa nga la phah ban leit tong um hi ban shet ja bad kum ka kynthei, ka shem jingeh namar ka jaka tong um ka long kaba jngai. Lada ngan buh nongïarap na ei ngan siew haba ka tulop kaba tang shih hajar tyngka”.
I la ong ruh, “Ka ktah bha ïa ka por jong nga namar mar sien ih ka ja nga hap ban shakri bad leit pynbiang ja shuwa ïa ki nonghikai, nangta nga sa khat ja ïa ki khynnah. Ym tang katta hynrei hadien ba ki la dep bam ki nonghikai, nga hap ban pynkhlieng sa ïa ki pliang ja jong ki. Hato nga ïoh tulop ban pynshet ja ïa ki khynnah ne ban shakri ïa ki nonghikai nalor ki don haduh 5 ngut 6 ngut”.
Iwei pat I longkmie I la buh jingkylli da kaba ong, “Hato ka dei ne em ka rukom ïa nga ba ngan hikai ïa ki khynnah skul ha ka por bym shym lah ban poi u khaw. Ïa nga la ju khot bad bthah ba ngan hikai ïa ki khynnah, namar ngam shym la shet ja. Don bun ngut ki lok kiba trei ïa kum kane ka kam ha ki thaiñ nongkyndong, kiba ju ud namar ïa ki la bthah ban leit wad dieng thang ban shet ïa ka ja ki khynnah. Hato ngin beh tang ïa kaei haba ka jingsiew pat ka long kaba rit.”