Mawkyrwat, Ïaïong, 15: Ka Deputy Commissioner jong ka South West Khasi Hills District, Mawkyrwat ka la ai ïa kane ka jingpyntip paidbah katkum ka jingmaham na ka Indian Meteorological Department ba kan don kan jinghap slap ryngkat u pyrthat bad ka lei lieh ha ki katto katne ki bynta jong ka South West Khasi Hills District ha ka 14, 15 bad 16 tarik u Ïaïong, 2022.
Namarkata, la kyrpad ïa ki paidbah ban shim ïa ki lad jingïada kum kaba khmih bad pynskhem bha ïa ki tiar ki tar ki ba lah ban shah rong ha ka lyer kum ki thup dieng, ki tin sop ïing, lane maw-it ba shong synjor, ki tin/sop theh ñiut, kin sign board bad kiwei kiwei ki mar kiba lah ban shah rong ha ka por ba jur lyer.
Lada ka jingba lei lieh ka long kaba jur bad neh slem, kan bha shibun ban nym pyndonkam ne ban pynmeh ïa ki tiar bording kum ki mobile, isteri, radio, telebision bad kiwei kiwei ki tiar kiba pyndonkam da ka bording.
La bthah ruh ba ki nongshong shnong ki dei ban long kiba phikir ban ïada ïa lade namar ka jingshlei um ka lah ban jia hadien jong u lapbah khamtam ha ki jaka kiba don harud jong ki wah bad ki wah duid.
La kyntu ïa ki paidbah ban kiar na kaba jam ki wah duid ki wah bah bad ki kshaid ha ka por ba jur slap wat kheiñ sting ïa ka bor jong ka um kaba jyndong bad tuid stet kaba lah ban pynkyllon. Kaba khadduh, wat tur ne ñiah ïa ki kali haba don ka jingshlei um bad kiar na ki post bording ban lait na ka jingshah bat ha ka.
