Hiar ki dkhot ka KSU ban syrdep, maramot ïa ka skul Sorkar ha Mawshluid

Mawkyrwat, Ïaïong, 15: Ka long kaei kaba pynlyngngoh bad kaba pynlehraiñ ruh ka sorkar jylla ba ki don ki skul sorkar (Government Schools) ha ka thaiñ Mawsynram kiba la shah ieh-beiñ khlem don ba phai khmat la ka long na ki nongmihkhmat ne ki bor ba dei peit jongka tnad pule puthi jongka jylla.
Kine ki jingshah niewbeiñ ki la paw pyrthei hadien ba ki dkhot bad nongïalam ka KSU South West Khasi Hills District ki la leit jurip, maramot bad syrdep ïa ki jingjot jingpei jong kine ki skul haka 14/04/2022 hapoh ka jingïalam jong u samla Jiedskhem Nongsiej, General Secretary KSU South West Khasi Hills District bad u samla Evansroy Nongrem, Education Secretary KSU South West Khasi Hills District.
Ka jingjot jingpei jong kine ki skul ka la long shaba palat kat haduh ba ki nongshong shnong ki la ïathuh ba ki khynnah ki hap ban kup shatri ha ka por slap lada ki kwah shong klas bad nalor kata ka duna ruh ha ki jingdon ïa ki tiar ba ju pyndonkam man ka sngi kum ki ben, ki desk, ki blackboard bad kiwei kiwei. Kumta ka seng ha kane ka sngi ka la ïoh ruh ban noh synñiang da ki tin, ki desk, ki whiteboard bad kiwei kiwei lyngba ki jingïanoh synñiang hi bor met jong ki dkhot jong ka.
Kine ki skul ki dei ka Nongshluid Government LP School (ka skul kaba la seng naduh ka snem 1920) bad ka Kenshluid Government LP School kiba dei ki skul ba don hapoh Mawsynram C&RD Block bad kiba dei ki shnong ba hap ban ïaid kjat 2 haduh 3 kynta namar ym pat lait kali.
Kane ka jingleit hiar jong ki dkhot ka seng ka la pynlung mynsiem ïa ki nonghikai bad ki nongshong shnong ha kaba ki la ong, ba ka dei ka sien ba nyngkong eh ba yn don kiba wan ban jngoh ban ïa kren ïa ki jingeh ki paidbah kane ka thaiñ. “Ym pat ju don mynno mynno lane mano mano ruh ban wan jngoh ïa ka skul ne shnong jong ngi wat hadien shispah snem ki jingshakri kane ka skul. Ka seng jong phi ka dei kaba nyngkong eh ban wan ha ryngkat ka jingshahshitom jong phi ban shah ïa u slap ha ka lynti ïaid kjat ba 2/3 kynta ban bah ïa ki ben bad desk”, la pynsngew da ki nongshong shnong.
Ka jingleit hiar ban ïarap bad synñiang lang jong ka seng ïa kine ki skul ka long hadien ba ka Education Cell jongka KSU South West Khasi Hills District ka la ïoh ban leit jurip la ar sien ar wat kata ha ka 15/02/2022 bad ha ka 21/02/2022 ha kaba kum ka seng ngi la ïoh sngew ïa ki jingud jingnam jong ki nonghikai, ki khynnah skul bad ki nongshong shnong jong ka thaiñ watla ki bun ki khynnah ba pule ha kine ki skul sorkar. Watla ki dei ki skul sorkar kiba ha ka jingshisha dei ki bor sorkar ki ban peit bad sumar bha hynrei haba ka sorkar ka leh matlah kumta na ka liang jong ka KSU kim banse ban leh hi ïa la ka bynta mynta ka kynti.
Ha ka jingjurip jong ka seng ki la lap ba bun ki kamra ki la pra bad ki tnum ruh ki la pei nalor kim don ïa ki tiar ki tar kiba biang ba dei ban pyndonkam man ka sngi. Ki la lap ba don ki kamra shet ki la pra nalor ba ym shym la don ba maramot shuh na ka liang ki bor sorkar ïa ki tnum, ki paiñkhana bad kiwei kiwei.
Ka seng ka pynpaw ïa ka jingsngewsih bad ka jingsngewkyndit namar dang shen ki la ïohi ba ka don ka jingpynshai hapoh Assembly ba ki skul sorkar ki bit ki biang ha ki thaiñ nongkyndong, hynrei kaei ba kum ka seng ka lap pat ki long markhongpong ha kaba kam shym la don ka jingkheiñ snep jong ka sorkar ban kyntiew ïa ki skul khamtam ha ki thaiñ nongkyndong.
Kine ki shu dei tang ki katto katne ki nuksa hynrei kiba bun ki shlem ai jingnang jingstad ne ki skul sorkar ha ki thaiñ nongkyndong ki shait shah ieh-beiñ ha kane ka rukom. Na ka liang ka Education Cell jongka KSU South West Khasi Hills District kan sa lum sa lang ïa ki jingeh ha ka pule puthi jong ka thaiñ nongkyndong bad shen kin sa leit ban ïa kynduh ïa ki bor ba dei peit jong ka tnad pule puthi ban pynsngew halor ki bynta jongka pule puthi ha ki thaiñ nongkyndong. Kane ka dei ka kyrwoh na u samla Evansroy Nongrem, Education Secretary KSU South West Khasi Hills District.