Shillong, Iaiong 13 : Hadien kumba ar taiew ei ei ba ka seng Lawei Baphyrnai ka la paw lyngba ki email ba ka byrngem pynbthei bom ha ki ophis ka tnad pule puthi bad jaka pule, la ïoh jingtip arngut ki dkhot jong kane ka seng kata u nongseng bad u nongbud ki la ngat ha shrip jongki pulit jongka Police Crime Branch.
Haba pyrshang ban kylli na u SP u la kyntait ban ïathuh ei ei da kaba ong ba yn sa pynthikna lashai. Hynrei ka khubor pulit kaba thikna pat ka ïathuh ba kine ki arngut ki la ngat ha ka shrip ki pulit ka Crime Branch Police Station.
Lah ban pynkynmaw ba kane ka seng ka la pyllait khubor ruh ïa ka email ba ka la phah sha u Myntri Rangbah ka jylla u Conrad K Sangma, da kaba pyrngem ban sdang ka jingpynbthei bom naduh ka 1 tarik u Jymmang da kaba sdang na ka ophis jongka MBOSE nangta kan sa bteng sa ha St Anthonys’ College bad St Anthonys’ School bad kumjuh ruh ha NEHU. La pynpaw ruh ba ïa kane ka kynhun la seng da ki 39 ngut ki dkhot kiba la dep pyntbit bha ha ki jingpule hynrei kiba khlem ïoh kam ïoh jam.
Kat haduh ba thoh ïa ka khubor ki pulit kim pat kwah ban ïathuh bniah shaphang kine ki arngut lait noh tangba ki ïathuh ba uwei u dei u nongseng bad uwei u nongbud. “ Ngi dang bteng ka jingtohkit ban tip shai la ki dang don shisha ne em kiwei kiba ïadon kti lang” ong u pulit ophisar da kaba ïathuh ruh ba ki pulit ki shim khia bha ïa kane ka kam khamtam ba la byrngem ban pynbthei bom ha ki skul bad college.
