Sdang u Myntri Rangbah ïa ka jingïalap election da ka Rally ba heh ha Tura
Tang hapoh 5 snem la bun ki jingkylla dur ha ri lum Garo : Conrad
![](https://mawphor.com/wp-content/uploads/2023/01/IMG_20230130_233326.jpg)
Tura, Kyllalyngkot 30 : U Myntri Rangbah ka Jylla bad National President ka National People’s Party (NPP) u Conrad K Sangma mynta ka sngi ula sdang ïa ka jingïalap elekshon ha la ka jong ka Constituency-51 South Tura da ka jingpyni ïa ka jingdon ki nongkyrshan kiba dang shaniah ha u kum u nongïalam jongki da ka jingwan tuid sha madan New Tura Law College.
Ha kane ka jingïalang paidbah la wan ban ïashimbynta da palat 5000 ngut ki nongkyrshan na ka Consituency kiba kyrshan ïa ka jinglong kyrtong jong u ha ka elekshon MLA 2023.
Haba pan ïa ka jingkyrshan ïa ka NPP ha kane ka elekshon ban long ha ka 27 tarik Rymphang, u Myntri Rangbah ula kren halor ki kam pynroi bapher bapher ba la pyntrei da ka sorkar MDA hapoh ka jingïalam jong u ha kine ki san snem, kaba u ong ba ka dei ka kam radbah kaba la khyllie ïa ki 15 snem ka jingsahdien ha ka Jylla khamtam ka Ri-lum Garo bad khamtam eh ïa Tura Constituency.
“Phi kum ki Nongthep Vote ka Tura phi la kyrshan ïa ka jinglong kyrtong jong nga ha ka elekshon shiteng samoi bad phi la pynjop donburom ïa nga da 8500 vote. Da ka jingkyrshan jong phi, nga la lah ban leh shibun ki kam ha kine ki san snem ha baroh kawei ka Jylla bad ha Tura ruh kumjuh” ula ong.
U Conrad ula ong ba ka Sorkar jong u kala buh kongsan eh ym tang kawei ka mat hynrei baroh ki kam pynroi ha baroh ki liang. “Nga la kren sha ki lad pathai khubor hadien ka jingshimti ïa ka sorkar ha u 2018, Nga la buh hakhmat eh ba baroh ki tnad la ka dei ka pule ka puthi, ki kam pynroi, kam pynroi surok, ki kam ïalehkai sport bad kiwei kiwei ki dei ban ai ka jingshakri hok ïa ki paidbah”.
“Lada ngim lah ban pynjanai ïa ka jingshakri ka Sorkar, da lei lei ruh ngim ym ïohi ïa ka jingkiew ka Jylla. Na kata ka daw, kaba nga buh hakhmat eh ka dei ka jingsynshar kaba bha, ka jingai jingshakri kaba janai, ka rukom pynïaid janai ïa ki kam kaban pynthikna ba ki kam pynroi kin ym long tang ha kawei ka kam hynrei ha baroh ki tnad treikam ka sorkar” ula bynrap.
Haba kren halor ka rukom pyntreikam ïa ka MGNREGS, u Conrad ula ong ba hapoh kane ka Sorkar jong u, ka jingbei tyngka ïa ka MGNREGS job Card Scheme, kaba ju neh kumjuh ha kine ki 20 snem, kala kiew bak-ly- bak.
“Ha u 2018, ka jingbei tyngka ka long tang T. 500 klur ïa ka MGNREGS hapoh ka Jylla hynrei hadien ba ngi shimti, kala kynjoh sha ka T. 1800 klur, kaba lehse don ki bym sngewlah ngeit ba kan urlong urlong kumne hynrei kane ka la urlong namar ba ngi la peit pyrman bad pyntreikam bha ïa kawei pa kawei ka project lyngba ka jingsynshar bha” ong u Conrad.
Haba kren halor ka jingtreikam jong ka Sorkar jong u, “Ngi don hatdong duh ha ka jingpyntrei ïa ka MGNREGS kata hapdeng ka 25-26 napdeng kiwei pat ki Jylla, hynrei ha kine ki san snem, ngi la long kawei na ki Jylla ba hakhlieh duh ha ka jingpyntrekam. Kane ka long ruh kumjuh ruh ïa ka skhim PMGSY…ka Jylla ka don hatduh eh bad ka Jylla kala shah thoh dak ïong (balcklist) hynrei ngi la pynkylla ïa kane bad mynta ka Jylla ka dei kawei na ki Jylla ba lah ban pyntreikam bha ïa ka PMGSY ha ka Ri”.
Ula ong ba mynshuwa ka Meghalaya kala lah ban pyntrei tang 700 km ka surok ha ka 15 snem hynrei hadien ka jingshimti ka NPP ïa ka sorkar hapdeng u 2018 haduh 2022, haduh 2000 km ka surok la dep ban pyntrei hapoh ka Jylla.
Haba kren halor ka jingjop jong ka Jylla ban pyntreikam ïa ka JJM, u Conrad ula pyntip ba ka Meghalaya mynta ka dei ka nuksa ïa kiwei pat ki Jylla haba pyntreikam ïa ka Jal Jeevan Mission (JJM) ban pynpoi umbam umdih sha ki longïing longsem.
“Wat u Myntri ka Jal Shakti na ka Sorkar India, u Rajendra Shekhawat ha ka por ba u wan ha Shillong, ula kren ïa ki Nongthoh khubor ba kiwei ki Jylla kin hap ban bud nuksa ïa ka Jylla Meghalaya” ong u Conrad.
Une u Khliehduh ka NPP ula ong ba kaei kaba ka Jylla Meghalaya kala lah ban leh ha kine ki san snem, kala pynlong ïa ka New Delhi ban shong beit bad ban ithuh ïa ki kam ka Meghalaya.
“Mynshuwa, ka New Delhi ka ju ñiew ïa ka Meghalaya kum ka Jylla ka bym lah ban pyntreikam ïa ka song pisa bala ai sha ka Jylla. Hynrei mynta, ki la kren halor ka jingkiew ha ka roi ka par ka Jylla. Kane ka dei ka jingaimynsiem ïa ka Meghalaya” ula ban jur.
U Conrad ula kular ïa ki paidbah “Ka jingphohsniew jong nga ka long ban pynlong ïa ka Meghalaya ka Model State bad ban ïakot kyrdan kumjuh bad kiwei ki Jylla hapoh ka Ri”.