Shillong, K’lyngkot 23: Shi bnai tam shuwa ka elekshon, ka Seng Trinamool Congress mynta ka sngi, ka la ïoh ïa ka jingkyrshan kaba khlaiñ, haba kumba 50 ngut ki nongïalam barim bad ki dkhot jong ka Garo Students Union (GSU) ki la pynïasoh bad ka Party.
Ka kyrwoh na ka Seng ka la ong ba kine kiba la wan pynïasoh bad ka Party ki long u President jong ka GSU South Garo Hills, u Salman D Sangma, u Rockey Marak bad kiwei kiwei. La pdiang sngewbha ïa ki da ka MLA jong ka Ampati, ka Miani D Shira, nangta ka State Mahila President, ka Selma D Shira, bad u Kyrtong ka Party na South Tura, u Richard Mrong Marak.
Haba pdiang sngewbha ïa kine ki nongïalam ka seng ki samla pule, ka Miani ka la ong ba ki samla ha Garo Hills ki tip bad ïohi ba ym don kiwei pat ki nongïalam, lait na u Dr. Mukul Sangma. Ka la ther tyngeh ruh ïa ka sorkar MDA hapoh ka jingïalam ka NPP, da kaba ong ba ki paidbah ki la mad bun ki jingeh ha kane ka sorkar bad dei namar kane ka daw kin sa ai jingsneng ïa ki ha kane ka elekshon.
U Salman D Sangma u la ong ba u la pynïasoh sha ka TMC dei namar ba kane ka Party ka burom lut ia baroh ki jaidbynriew bad ki jait niam. U la kop ruh ba un ïatrei shitom lang bad ki nongïalam kane ka Party ban pynjop donburom ïa ka Seng bad kan long ka Seng kaba jop bun eh ki MLA ha kane ka elekshon MLA 2023.
Ka Seng ka pymtip ruh ba don bun ngut ki nongkyrshan ka NPP ruh kiba la wan pynïasoh bad ka TMC.
Ha kajuh ka por bun ngut ki nongkyrshan jong ka UDP bad NPP mynta ka sngi ki la wan ban pynïasoh bad ka TMC ha Umroi Constituency, ha kaba la pdiang sngewbha ïa ki da u Vice President ka Party bad MLA ka Umroi, u Bah George B. Lyngdoh ryngkat ka jingïadon lang u MP ka Rajya Sabha na West Bengal, u Derek O’Brien.
Haba kren ha kane ka jingïalang, u Bah George, u la kular ba lada u jop biang, un ïai trei na ka bynta ka roi ka par jong ka Constituency bad kumjuh ruh na ka bynta ka jylla hi baroh kawei. U la ong ruh ba lada ka TMC ka wan ha ka bor ban sngap ïa ka jingud jingnam ki paidbah bad ïa ki jingeh jong ki.