U dak jingkylli uba heh bha uba ki paidbah nongkyrshan ratbah ki buh ha lade mynta la ka Indian National Congress kan jah kyrteng noh na Meghalaya hadien ka elekshon MLA jong ka Iingdorbar Thawaiñ ka ban sa long ha u snem 2023. Ka jingtroiñ jong ka Seng Congress ka la wan jia ryngkhat hadien ba ka la mih ka jingbym hun jong ki 12 ngut ki MLA ka Seng Congress ïa ka jingpynkhamti jong ka High Command ka All India Congress Committee (AICC) ïa ka lyngkor President ha ki tyrpeng jong u Bah Vincent H. Pala .
Kum kane ka apot sepsngi kam pat ju jia mynno mynno ruh ïa kano kano ka seng saiñpyrthei hapoh kane ka jylla Meghalaya ba ka party kaba la jop bun paid ha ka samoi elekshon kan ringswai suki pa suki kat haduh ba kan da ngam syndon na ka jingryngkang shi miet shi miet jong ki ngut ki MLA sha kawei pat ka party.
Ki 12 ngut ki MLA phoilian ki bym hun ïa ka rai jong ka AICC ban thung President ïa u Bah Vincent Pala ki la phet krad shimietshimiet sha ka All India Trinamool Congress (AITC) hana ba ka jhad jong ka Congress ka la ngam bad sa tang ban shu ngam jyllop namarba ki san ngut ki MLA ki dang pyrsad mynsiem hapoh kane ka party.
Watla ki san ngut ki MLA ki kren darapjot ba kin ïai don beit hapoh ka Party hynrei ki ladep buh jingmut lypa ba tang shu wan ka samoi elekshon ha u snem 2023 ki la phet krad lailum laiwah khnang ban lait na ka jingïap jyllop ha ka jingngam jong ka jhad ka Seng Congress.
Naduh ka Elekshon Lok Sabha kaba ladep, ki dak ki shin ki la pynpaw ba ka Congress kaba la synshar ïa ka ri India la 60 snem kynthih kam lah shuh ban dang khie khlieh na kiba bun ki daw. Ïa mynta leilei la nang ïohi shuh shuh ba ki nongïalam ba satar jong ka Seng Congress ki bym hun ïa ki rukom treikam jong ki bor bahalor ka AICC ki la mih noh ka party bad ki la leit pynïasoh sha ka Bharatiya Janata Party kaba bat mynta ïa u lakam synshar hapoh ka ri India bad kaba la sa ïohbat ïa u lakam synshar ha kiba bun ki jylla.
Ka jinghiar arsut jong ka Seng Congress hapoh kane ka jylla Meghalaya ka la pyndiaw mynsiem haduh katta katta khamtam ïa kito ki nongkyrshan baratbah kiba ju ïai kyrshan ïa kane ka seng sain pyrthei da ki phew phew snem. Kiba bun ki pynpaw ïa ka jingnoh mynsiem haduh katta katta ïa ka jinglong jingman bad ka jingmih ki kynrum kynram hapoh kane ka seng saiñpyrthei kaba la rim bha hapoh kane ka jylla Meghalaya bad kaba la synshar ruh la bun tylli ki snem.
Ki jingïaryngkoh jong ki nongmihkhmat na kawei ka party sha kawei pat ka paw shynna ba ka dei beit tang ka jingkwah myntoi shimet watla bunsien ki pynpaw ba ka jingmih na ka iing rim ban leit kiew sha ka ing thymmai ka long ban ai ïa ka jingshakri kaba kham bha ïa u paidbah. Kine ki dei tang ki kyntien darapjot bad ki kyntien phlanduman suda. U paidbah mynta ka juk u la stad bad u shu peitkai bad peitsiar ïa ka jingïaleh khun jakai jong kine ki nongmihkhmat kiba la shah pynkupbor ha u paidbah.
Jin lada ki bor bahalor ka Seng Congress kin jin da la thung ïa u Bah Charles Pyngrope kum u President jong ka Meghalaya Pradesh Congress Committee (MPCC) katta ka sem jong ka congress kan ym kad arliang haduh katne namarba kiba bun ki MLA ki la ju pynsngew teng ba ki kwah ïa u Bah Charles Pyngrope ban kiew khet sha ka kyrdan President jong ka Party hadien ka jingshongthait noh jong u Dr. Celestine Lyngdoh.
Haduh mynta hi u paidbah nongshong shnong ba bun balang jong ka jylla Meghalaya um pat lah satia ban pdiang ïa ka AITC kum ka seng saiñpyrthei bad lada ki 12 ngut ki MLA kin jop biang sa ha u snem 2023 kan ym dei satia ba ka Trinamool Congress ka pynjop ïa ki, hynrei ki paidbah ki jied namarba ki dang shahniah. Hynrei kan long kaei kaei ka ban jah burom lada napdeng kine ki 12 ngut ki, kin jop sa tang uwei, ar ne lai ngut.
Dang khyndiat bnai u President ba thymmai jong ka Meghalaya Pradesh Congress Committee (MPCC) u Bah Vincent Pala u la ong ba ka jingmih iing u Dr. Mukul kan plie lad ïa kiwei pat ki riewpawkhmat kiba ju angnud ban ïatreilang hapoh ka Congress bad kiba wit haduh katta katta ïa u Dr. Mukul namarba u long diengpyngkiang ha baro ki liang. Lada kan jin da la urlong shisha khlempep ka Congress kan dang pyrsad mynsiem lada ki nongkyrshan baratbah jong ka seng Congress ki bym ju shon kti sha kano kano ka party kin kyrshan biang ban pynlong ïa ka Congress ba kan khieh khlieh ha u snem 2023.
Ka Elekshon sha ka Ingdorbar Thawaiñ ka dang jlan sa shi snem pura bad ki jingkylla ha ka saiñpyrthei kin nang kylla na kawei ka aiom sha kawei pat namarba ka ju long ka dustur ba ynda la wan ka samoi elekshon kiba bun ki snar ïalehkai kiba la pynkhreh bha ïa lade ban rung sha ka jylli jong ka saiñpyrthei kin sa shim rai shano ban leit snoh.
Ha ki riewsaiñpyrthei kiba la ih bha ha ka jylli politik ki tip kumno ban kheiñ jingkheiñ bad ka shong sa tang ha ki kyrtong kiba ka Congress kan sei madan ha u snem 2023 la ki long neem kiba tbit bad kiba lah ban pynkohnguh ïa u paidbah ban pynphong pansngait ïa ki ynda la poi ka samoi jied syiem.
