Mawkyrwat, Kyllalyngkot 18 : Kum ka dak jong ka jingkynmaw burom ïa ki matti jong u uwei na ki riew rangbah ka dong ka thaiñ, u bah Rowell Lyngdoh (bam kwai ha dwar U Blei) uba dei ruh u Symbud Myntri Rangbah ba rim jong ka Sorkar Meghalaya, na ka liang ka All Meghalaya Pradesh Trinomool Congress Mawkyrwat Block Committee (AMPTCMBC) ka la ïoh ban pynlong ïa ka lympung ïalehkai kynjatbol ba la tip kum ka 1st Rowell Lyngdoh Memorial Football Tournament 2023 ba la pynïaid da ka Mawkyrwat Constituency Socio Economical and political Awareness Committee (MCSEPAC) ha madan Nonglang, South West Khasi Hills District.
Ha kane ka sngi u bah Sounder S. Cajee u kyrtong na ka Party TMC u ban sa ïa khun MLA Election 2023 na ka Mawkyrwat Constituency ula long kum u kongsan ban plie pyrda noh ïa kane ka lympung ïalehkai kynjatbol.
Ha kane ka sngi u bah Cajee ula ïoh ruh ban ai sngewbha da ki sopti (jersey) ïa ki sports bapher bapher kiba don ha kane ka dong ka thaiñ Mawkyrwat.
Ki kynhun ïalehkai kiba la ïoh ban ïalehkai sdang ki long ka Rangmaw Sports Club pyrshah ïa ka Jakrem Sports Club bad ka Mawkyrwat Sports Club pyrshah ïa ka Sakwang Sports Club bad ki kynhun kiba la wan ïashimbynta ki don haduh 16 tylli na ka bynta ka Mawkyrwat Zone.
Nalor u bah Sounder S. Cajee la ïa don ryngkat ruh ki ‘riew rangbah ki nong kot kam jong ka MCSEPAC bad ki paidbah ki riew ieid ïalehkai kynjatbol kiba la wan ban pynshit pynshngaiñ ha kane ka sngi.
