Ka bym lah long ba ka sorkar kan die bording kham duna dor sha ki karkhana: CCORMAU

By Mawphor Editor On Jan 18, 2023

Shillong, K’lyngkot 17: Ka Coordination Committee of Registered MeECL (Employees) Associations and Unions (CCORMAU), ha ka sngi Nyngkong ki la pynpaw ïa ka jingbym sngew ïahap ïa ka jingdie bording ka sorkar sha ki karkhana ha ka dor kaba kham duna ban ïa ka dor kaba ka sorkar ka die sha ki paidbah.
Ha kane ka sngi ka CCORMAU ka la pynlong ïa ka jingïakhih jong ka ban dawa na ka sorkar ba ka dei ban siew noh ïa ka tulop jong u bai Nohprah jong u 2022 bad kumjuh ba ka dei ban pynlait noh ïa ki jingmyntoi baroh kaba ki dei ban ïoh.
Haba kren sha ki lad pathai khubor hadien ba la dep ban shong jingïalang bad u Chairman-cum-Managing Director (CMD) ka Meghalaya Energy Corporation Limited (MeECL) u Sanjay Goyal, u Vic president ka seng u Bah Arju Dkhar u la ong ba ha ka jingïakynduh ki pynpaw ba ym tang ïa ka jingdawa ban siew tulop noh ïa ki bad ban pynthikna ruh ba ka sorkar kan siew tulop biang por man la u bnai.
U la ong ba ha ka jingïakren kawei na ki mat kiba kum ka Union ki la ai jingmut ba dei ban pynkylla noh ïa ka dor jong kabai thang ding elektrik kaba die sha ki kompeni namar ka sorkar ka die tad katba sha ki paidbah ka die ha ka dor kaba kham rem.
U la ong ba lada kyntiew ïa ka bai tang ding ba ju die sha ki karkhanaka jingïoh lum khajna kan kham heh bad kumjuh u ïathuh ba ka union ka la ai jingmut ba ka sorkar kan wad ïa ka daw halor ka jinglait ei ka khajna bording bad ka kumjuh ka jingbym siew bording jong ki katto katne.
“Khlempep lada ka sorkar kan shim ïa ka sienjam ka ram kaba 2500 klur kaba ka tnat ka hap kit yn lah ban kham pynsting da bun shah,” u la ong.
Ha kaba nyngkong ki nongtrei hapoh ka shatri ka CCORMAU ki la pynlong da ka jingïakhih bad ai por ba dei ban weng ïa kane ka jingeh hapoh 48 kynta hynrei dei hadien ba ki la dep ban ïakren sngewthuh jingmut ba ka CCORMAU ka la ai por shitaiew “namar ngi sngewthuh ba ka jingeh kaba mynta kaba ka tnat ka ïa kynduh ka dei kaba ka la kit raibi la katto katne snem mynta,” u la ong.