Shillong, Kyllalyngkot 17 : Ka Pynursla Block Trinamool Youth Congress Committee ka la pynshai paidbah ba kam don kano kano ka jingïapait ïapra ne ka jingbym ïa sngewthuh jingmut jong ka Youth Trinamool Congress ha Pynursla kumba la kam da ki katto katne ha ki lad pathai khubor.
Haba pynshai halor kane u President jong ka Pynursla Block Trinamool Youth Congress Committee u samla Namshai Ryngksai ha ka sngi ba ar u la ong ba ki 26 ngut kiba la kam ba ki la mih noh, na ka liang ka party kam ithuh satia. “Ka parti kam ithuh satia ïa kine ki 26 ngut lait noh tang ïa ki arngut bad kine ruh kim dei ki dkhot jong ka party hynrei kiba dang don hapdeng ka jingïakren ban ïatreilang na ka bynta ka election 2023,” ong u samla Namshai Ryngksai.
Na ka liang u Bah Dominic S Wankhar uba dei u General Secretary ka Pynursla Block Trinamool Congress u la ïathuh ba ka jingwan jong ki ban ïasyllok ban ïatreilang bad ka party kadei tang ba ki mut ban shim kabu da kaba kyrpad ki jingïarap pisa ban pynlong ïa ka Riwar Festival.
“Kumba la kren da u President kadei kaba shisha namar ba kine kim dei ki nongkitkam ne ki dkhot jong ka TMC Youth Pynursla namar ïa ki ym pat shym la pynskhem bad wat ka state party ruh kam ithuh ïa ki. Ki wan sha ka parti tang ban shim kabu bad uwei napdeng kitei ki 26 ngut u la wan ban kyrpad ba ngan pynïoh ka jingïarap na bynta ban pynlong ïa ka Riwar Festival.”
“Nga la kular ba ngam lah ban ïarap bad ka party ruh kam lah ban shu ai klumar kat ïa kaba ong khamtam namar ba kadei ka society kaba nabar bad dei na kane lehse ka daw ba kim treh ban kyrshan ïa ka parti ïoh lehse kata ka party kaba ki leit ban ai jingkyrshan ka lah ban ïarap,” ong u Bah Dominic.
