Shillong, ïaïong :Da ka jingthmu ban kyntiew ïa ka bha ka miat jong ki nongtrei bylla la thaw ïa ka Society for Labour & Development (SLD Agency) da ka jingthmu ban kyntiew ruh halor ka ïoh ka kot ka roi ka par ha ka akor ka burom jong ka long briew man briew bad ruh ban ïarap hapdeng ki nongbylla bad ki nongaikam ai jam.
Ka thong jong ka Society ka thmu ruh na ka bynta ban pynïoh ïa ka labour licence na ka tnad jong ka sorkar ïa ki nongtrei bylla kiba na bar jylla khnang ba kin trei katkum ka aiñ, ban ïarap ia ki kontraktor ne kino kino ki agency ban pynïoh nongtrei ne nongbylla sngi. Ban ai jinghikai ïa ki ba kin don ka jingkitkhlieh ïa la ka jong ka kam ka ba ki trai ki la shaniah ha ki.
Ka jingthmu ka long ruh ban ai ka jinghikai ïa ki ba kin tip ïa ka akor ka burom ha ka jaka trei jong ki, ban tip ban leh khuid leh suba, ban ïarap bad ban ai jinghikai ïa ki nongtrei bylla kiba hap ban trei da ka bor technology ba thymmai kum haki kam office bapher bapher kiba hap da ka rukom online bad ruh ban bud dien ïa ka jingïarap jong ka bor sorkar ïa ki nongtrei bylla.
La seng ruh ïa kane ka kynhun ban ai awareness prokram ïa ki Riew khynthei ki ba don khun kiba trei bylla ha ka ba ïadei bad ka koit ka khiah, ka jinghikai ïa ki samla ban lait na ka shong kha shong man kaba lyngkar khamtam ïa ki kynthei, ban wad ki lad ki lynti na ka bynta ban kyntiew ha ka ioh ka kot bad ban kyntiew ïa la ka long briew man briew ban long ka jingmyntoi ha ka ri bad ka jaitbynriew, ban ïarap bad ban buh ka jaka ri khyllung na ka bynta ki long kmie kiba trei bylla ki ba dang rit khun (Creche ) nalor kiwei kiwei ki jingïarap kiba ïadei dur bad ka jingthmu jong kane ka kynhun.
Khatduh eh kane ka society ka dei kaba la seng tang para khynthei (long kmie bad khynthei samla ),ryngkat ka jingkyrshan lang jong u Symbud Myntri Rangbah ka Jylla u Bah Prestone Tynsong, u ba long ruh I Kongsan ha ka jingplie ïa kane ka Society bad kumjuh la don ryngkat lang I MLA ka Laitmukhrah Constituency I Dr Mazel Ampareen Lyngdoh , U Principal Secretary jong ka Labour Department Shri G H Raju bad kiwei kiwei.Kane ka long katkum u kyrwoh lyngba Ka Chairperson kong Sweety B Tron bad General Secre tary Kong Idari Tron.
