Nongstoiñ, Ïaiong 12: Haba phai sha ki rukom bapher bapher, u Synsar u dei uwei na ki jingthung kiba mih kynrei ha kiba bun ki bynta kum ha ki thaiñ War, Bhoi, Lyngngam, Nongtrai, Muliang bad Rimen, lait noh ha ki jaka pdeng jong ka ri lum Khasi Jaiñtia.
Ha kine ki khyndiat sngi ha ka jingleit jurip jong u nongthoh khubor ïa bun bah ki jaka rep ha ki shnong ki thaw hapoh kiba don ha ki thaiñ Lyngngam bad Muliang, la lap ba kiba bun ki nongshong shnong ha kitei ki thaiñ ki im da ka rep ka riang bad ki jingthung ba kiba kham kynrei eh ki long u synsar, ki diengsoh, u sying, ka kait, bad ki jait jhur ba bun jait.
Nalor kata la lap ruh ba ha ki thaiñ Muliang ter ter haduh khappud bad ka Assam, palat mar shiteng na ki lum ki wah ki dap da ki jaka rep synsar. Nalor ka jingdon jong ki jaka rep synsar, la lap ruh ba ki nongshong shnong ha kitei ki thaiñ ki la ïabeh ruh ban thung kwai bad tympew ha ryngkat ki dieng ba rem dor kum ki dieng teak, tanglung, dieng phiang, dieng rai bad don ruh kiba la pyrshang ban thung da ki dieng ba rem dork um ki dieng agor.
U Bah P.Mawlieh uwei na ki nongrep ha katei ka thaiñ , u la ong ba ha ki snem ba la dep baroh ka kam rep synsar ka long thik kum ka kam khalai nusip namar don ki por kiba ka dor u synsar ka poi tang shi tyngka shi kilo. Don pat ki por ba ka dor ka kiew bad ka poi sanphew haduh hynriew phew shi kilo.
U la ong ba na ka liang ki nongrep ruh ba hadien ba ki la ïoh sngew ba ka sorkar ka la mynjur ba ïa u synsar yn ñiew noh kum u mar rep. Kumta ka long ka jingkyrkhu kaba khraw khamtam eh lada ki bor sorkar ki lah ban the lakam ïa ki mahajon ki ba heh kiba ju thied synsar ba kim dei ban khñiot palat ïa ka dor, namar ka kam rep synsar kam dei kaba suk hynrei ki nongrep ki hap ban trei shitom.
U la ong ruh ba na ka por sha ka por ki paidbah ki ju ïoh sngew ba lada rep synsar, ki umpohliew kin rngad noh hynrei ha ka jingshem bad jinglap jong u kum u nongrep, lada ki nongrep synsar ki kiar ban pom noh ïa ki dieng kiba la kham heh bad ruh ban thung khambun, kam don jingktah ei ei ïa ki umpohliew ne tyllong um kiba don ha kitei ki jaka rep.
