Nongstoiñ, Ïaiong 12: Ha ka jingbuddien bniah jong u nongthoh khubor, la lap ba na man la kawei pa kawei ka shnong kiba don ha khappud ki don ki nongshong shnong kiba na ki shnong Garo bad Khasi kiba pynrung ïalade ha baroh ar tylli ki thup kyrteng nongthep vote (electoral roll) jong ka Meghalaya bad Assam.
Kiba kham bun ki nongshong shnong ki ba leh ïa kata ki dei naduh ki shnong kiba don ha ka thaiñ Malangkona Athiabari, Aradonga, Kamphaduli, ter ter haduh Kyrshai. Nalor kata ki don ruh ki nongshong shnong kiba dei ki Khasi kum na Langpih, Mawlan, Ïewnongma, Mawdiangsnam, Umwali haduh Umbyrsit kiba pynrung kyrteng ïalade ha ka Electoral roll jong ka sorkar Assam bad ka jingpynrung kyrteng jong ki ka long tang na ka bynta ban ïoh jingïarap kum ki skhim shna ïing shna sem bad kiwei kiwei.
Ha kaba ïadei bad ka jingdon jong kitei ki nongshong shnong kiba bam ar maloi, u nongthoh khubor ryngkat ka jingïatreilang bad ki nongsynshar shnong, ki riew rangbah bad ki samla na kitei ki shnong khappud, la lap ba ki don haduh ar hajar tam ki nongshong shnong kiba don kyrteng thep vote ha Meghalaya bad Assam.
Kumba long ïa mynta ym pat lah ban pynpaw ïa ki kyrteng jong kitei ki ar hajar ngut tam kiba don kyrteng thep vote ha baroh ar ki jylla, namar ki dang don shibun kiwei pat kiba ka jingbishar bniah ïa ki kyrteng, ki shnong ba ki shong bad ki polling station ba ki don kyrteng ka dang ïaid shait shait shait tad haduh ban da lap lut ïa baroh.
Ha kaba ïadei bad ka jingbuddien ban lap ïa kitei ki ar maloi ka dei ka kam kaba eh haduh katta katta. Kumta ka sorkar ba ka dei ban shimkhia halor katei ka kam namar lada ka sorkar ka shu sngap mynthi bad kam leh ei ei ban lait na kiba bun ki jingeh, ki riew rangbah na khappud kim banse ban leit sha ki bor kiba kham halor bad wat shaduh ka Election Commission jong ka ri India, ban kan kan leh ïa kaba donkam.
Namar lada ki kyndon ba ka ECI ka la pynmih ka ong uwei u briew kawei ka vote ka long kaba beaiñ ba uwei pa uwei u briew u lah ban thep vote ar sien lai sien ne kat ba u sngew bit, hynrei kata ruh ka shong ha ka ECI ba kan rai. Wat la katta ruh kaba kut ka shong ha ka mon jong uwei pa uwei u ba pynrung kyrteng thep vote ialade ha ki ar jylla ba kin rai shano kin leit sha Meghalaya ne sha Assam.
