Jowai, Ïaïong 12: Ka ophis jong u District Sports Officer West Jaiñtia Hills Jowai lyngba u ma K. Passah, la pyntip ba shen yn pynlong noh ïa ka ‘Inter School Athletic Meet, 2022 ha madan Kiang Nangbah Stadium, Jowai ka ban sdang naduh ka 11, 12 bad 13 tarik jong u bnai Jymmang, 2022, hadien ba la hap ban pynsangeh ïa ka la 2 snem na ka daw jong ka khlam Covid-19.
Ha kane ka Athletic Meet mynta ka snem yn pynbynta ïa ki khynnah ha ki lai kyrdan kata ha ka rta kaba U-14, U-16 bad U-18 snem na ka bynta ki khynnah shynrang bad khynthei ki ban wan ïashim bynta na ki skul bapher bapher hapoh ka West Jaiñtia Hills District.
Ïa ka rta hapoh ka kyrdan U-14 yn kheiñ ïa ka tarik kha hapdeng ka 30.11.2008 haduh ka 29.11.2010, ïa ki khynnah U-16 yn kheiñ ïa kiba la kha hapdeng ka 31.11.2006 haduh ka 29.11.2008 bad na ka bynta kiba U-18 snem yn kheiñ ïa ka tarik kha hapdeng ka 33.11.2004 haduh ka 29.11.2006.
Ha ka jingïadei bad kane kan don ka jingïalang jong ki nonghikai ne ki nongmihkhmat na ki skul bad ki nongtrei ka DSO ka ban long ha ka 26 tarik Ïaiong, 2022 ha ka por 11 baje mynstep ha ka ophis treikam u District Sports Officer West Jaiñtia Hills Jowai.
Katba ïa ka jingjurip ïa ki khynnah ïalehkai (Screening) yn pynlong ha ka 28 tarik Ïaiong, 2022 ha katei hi ka ophis naduh ka por 9 baje mynstep haduh ka por 4 baje nohphai sngi.
La pyntip ruh baroh ki khynnah ïalehkai hapoh kitei ki lai kyrdan ki hap ban wanrah lang ïa ki Original Birth Certificates ba la ïoh na ka ophis C.E.O, Municipal/ CHC/ PHC ha ryngkat ka form.
Yn ym pdiang shuhïia kino kino kiba la wan poi hadien jong katei ka tarik (Screening) ba la buh, ha ka juh ka por kin hap ban rah lang bad kawei ka dur Photo passport kaba suh lang haka form.
