Nongstoiñ, K’lyngkot, 11: Mynta ka sngi balang ka 11 tarik Kyllalyngkot ki dkhot jong ka Hynñiewtrep Achik People Council (HAPC) ha ka jingïalam jong u bah Jylliewsingh Marweiñ President, ki la leit ban ïakynduh ïa u bah Garod LSN Dykes Deputy Commissioner ka West Khasi Hills, ban pynkynmaw biang ïa u halor ka shithi kaba ki la aiti ha u naduh u bnai Naiwieng jong u snem ba la dep, ban kyrpad ba un phah tohkit halor ka jingphah maramot ïa ki skul kiba hap hapoh Mawshynrut Block bad ruh ka jingbteng ïa ki kamra klass ba kynthup ïa ki LP bad Upper Primary skul, kiba la pyntrei na ka MLA skhim.
Kum ban pynkynmaw ba ki nongïalam ka HAPC ki la dep ai da ka jingthoh sha u Deputy Commissioner ban phah tohkit, ka dei hadien ba ki la ïoh ïa ka jingujor na ki paitbah nongshong shnong, ba ka jingpyntrei ïa kitei ki skul kam shym ïahap satia bad ka mang pisa jong ka sorkar.
Nalorkata ïa kitei ki skul la pyntrei da ka Public Implementation Committee ba la khlieh da u MLA kum u Chairman, ha kaba katei ka Committee kam shym la kynthup satia ïa ki dkhot jong ki Managing Committee jong ki skul ba la pyntrei. Dei halor katei ka nongrim ba ki kontrak kiba pyntrei ïa kitei ki skul, ki la leh katba sngewbit bad ka jingpyntrei ruh ka long tang dep rukom bad kaba torti haduh katta katta.
U bah Jylliewsingh haba ïakren bad u nongthoh khubor hadien ba la mih na kamra jong u Deputy Commissioner, u la ong ba ki don haduh khatlai tylli ki skul ba ki paitbah nongshong shnong ki la ujor bad kim hun satia lada ka sorkar kan shu iehnoh kumto khlem da tohkit.
Nalorkata u la ong ba ka jingtrei tang dep bad ka jingtrei torti jong ki kontrak, ka pyni shai ba ka don ka jingbamsap kaba jur bha. Ka seng kam kwah satia ba ka bamsap bampong kan don haba pyntrei ïa kino kino ki skhim sorkar kiba dei na ka bynta ka jingmyntoi jong ki paitbah nongshong shnong.
U la ong ba lada ka jingphah tohkit jong u Deputy Commissioner kam treikam kumba u la kular, ka seng kan ym aili hynrei kan leit ban tied jingkhang wat shaduh ka ïingbishar ruh.
