Shillong, K’lyngkot 04: Ki dkhot ka Seng Hynniewtrep Youths’ Council- Shella Area Unit ha ka sngi Balang ki la ïohbat haduh kumba 32 ngut ki bar jylla kiba lah wan sha Shella da ka jingthmu ban wan bylla sngi khlem ki kot ki sla kiba biang.
Hadien ba ka seng ka la ïoh bat ka la pyrshang ban kylli pyrthew ïa kine ki bar jylla bad kine ki bar jylla kim shym la don ïa ki Registration Card ba ki dei ban ïoh katkum ka Meghalaya Identification, Registration (Safety & Security) of Migrant Workers Act, 2020.
Ka seng hadien ba ka la lap ïa kane ka jingbym don kot don sla ka la pynher krad ïa kine ki bar jylla ryngkat bad ka jingmaham ba kim dei ban wanrung shapoh ka dong ka thain khlem ki kot ki sla kiba biang.
Shuh shuh ka seng ka kyntu ruh ïa ki bor ba dei peit ba kin shimkhia ban pyrkhing ïa ka rung ka mih kiba kum kine ki briew shapoh ka Bri u Hynniewtrep na ba ngim tip kiba kumno ki jaidbriew kin wan bad ïoh ki pynlong pynban ka jaka riehtngen bad leh ïa ki kam sniew ha ki shnong ki thaw bad ki dong ki thain jong ka ri.
