Jowai, Ïaïong 11: Ka lympung ïalehkai phutbol ba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la pynïaid da ka West Jaiñtia District Sports Association (WJDSA) kaba la long mynta ka sngi 11 tarik u Ïaïong ha madan Kiang Nangbha Stadium Jowai.
Ha ka jingïakhun ba nyngkong na ka liang ka kynhun ïalehkai jong ka Maitshaphrang Mootyrshiah kala jop da 1-0 kol pyrshah ïa ka Pateinki Sabah bad ïa katei ka shi kol la theh da u Raymon Sten ha ka minit ba 73.
Ka jingïakhun ba ar kala long hapdeng ka Madankynsaw Mookyndeng pyrshah ïa ka Mupliang, ha kaba ka Madankynsaw kala jop da 5-2 kol, ïa ki kol na ka Madankynsaw la theh da u Cornelius Suchiang ha ka minit ba 8 bad 39, u Ferdinand Sayoo ha ka minit ba 12 bad u Dongri Phawa ha ka minit ba 18 bad 56. Katba ïa kitei ki ar kol na ka Mupliang la theh marwei da u Emi ianga Phawa ha ka minit ba 1 bad 76.
Ha ka jingïakhun kaba lai pat bala wan ban aireng hapdeng ka ka Madan Thadmuthlong pyrshah ïa ka Tpep-Pale, ka Madan Thadmuthlong kala jop da 3-0 kol bad kitei ki kol la theh da u Precious Tang ha ka minit ba 29 & 76 bad u Manhok Suchiang ha ka minit ba 68.
Ka jingïakhun lashai ka sngi 12 tarik kan long hapdeng ka Khliehshnong Ialong pyrshah ïa ka Iooksi Youth Welfare ha ka por 11 baje mynstep, ka Khliehmuchut Shangpung pyrshah ïa ka Lumkhangdong Kyndongtuber ha ka por 1 baje nohphai sngi bad ka Myrjai pyrshah ïa ka Mawsiang FC Nongkhroh haka por 3 baje janmiet.
