Shillong, Nohprah 23 : U samla Ranasing Khyriem bad ka samla Medari Kharsohnoh ki la ïoh ban phong ïa ka pansngiat U ‘Nai Khatsaw synñia bad ka Lukhimai ha ka lympung ïakob pyni riam tynrai u Khasi ba la pynlong da ka Khasi Student’s Union ha kane ka sngi thohdieng ha Soso Tham Auditorium.
Ïa ka khusnam ba ar napdeng ki shynrang la ïoh da u samla Wellsenstar Kharmawlong katba ïa ka khusnam kaba lai pat la ïoh da u samla Kitkupar Nongsiej.
Ha ka liang ki kynthei pat ïa ka khusnam ba ar la ïoh da ka samla Bashimti Snaitang katba ïa ka khusnam kaba lai pat la ïoh da ka Ferenenia Aprillian Kharsyntiew.
Ha kane ka sngi la sam ruh ïa ka khusnam sha u Bah Remistar Marthong kum u nongpynwandur riam ba tbit tam katba ha ka liang ki kynthei pat la ïoh da ka Kong Ibansara C Shylla.
Ha ka liang ki nongriam Lat ba itynnad tam la ïoh da u samla Ranasing Khyriem bad ka Labianglang Diengdoh katba ïa ka khusnam nongkren ba tbit tam la ioh da ka samla Bashimti Snaitang.
Ïa katei ka lympung kaba la wan ban shim bynta haduh 24 ngut, kata 13 ngut ki samla shynrang bad 11 ngut ki kynthei la wan ban pynhap pyrda da u MLA ka Mylliem Bah Hamlet Dohling ba dei ruh u nongsdang ba nyngkong eh ïa katei ka lympung ha ki snem 1998.
La donlang ruh ha kane ka sngi naduh u Bah Daniel Thangkhiew, Officer on Special Duty (OSD) ka sorkar jylla bad ruh u President ka KSU, Bah Lambokstarwell Marngar nalor ki nongïalam jong ka KSU Upper Shillong bad kiwei kiwei.
