Shillong, Nohprah 23 : Ka Congress ha ka sngi Thohdieng ka la kob lang ba ka don ka jingkyrmen ba kan jop haduh mar shiteng ne palat ïa ka mar shiteng ka jingdon ki kyrtong kiban jop ha kane ka elekshon MLA kaban long ha u snem ban wan.
Shwa kane, u President ka Meghalaya Pradesh Congress Committee, Bah Vincent H Pala u la ïathuh ba ka party ka la pynkhreh mynta ban phah haduh 46 ngut ki kyrtong sha ka All India Congress Committee ban mynjur ïa ka kyrteng jong ki kyrtong ha ka kylla kaba nyngkong.
“Na kine ki 46 ngut ki kyrtong kumba 16 ngut ei ei ki dei ki MLA ne MDC barim bad kiba lait na kitei dei beit ki durkhmat ba thymmai. Na kitei ki 46 ngut ki kyrtong kumba 30 ngut ngi don ka jingkyrmen ba ngin poi sha ka thong,” la bynrap shuh shuh u Bah Pala.
Katkum ka jingong jong u, ïa ki kyrtong la bishar shwa da ka Block Congress bad nangtei pat sha ka District bad sha ka MPC ha shwa ban phah pat sha ka AICC.
La pyntip ruh ba na ka party hi ki buh thong ban pynïeng baroh 60 tylli ki constituency watla ïa ka rai kaba khatduh ka party kam pat shim.
Da kaba pynpaw ba watla kim don shuh tang uwei ruh u MLA jong ka party ban aireng biang na ka tiket Congress ha kane ka elekshon ban wan, u Bah Pala u la ong ba kumba ka ju jia barabor hi jan mar shiteng ki MLA ki ju shah rem beit bad kumta kane ka plie lad ïa ki durkhmat ba thymmai ban mih bujli.
“Peit kum ha Sohïong hadien ka jingieh noh ki riew rangbah ïa ka party ngi la ïoh pat da u kyrtong uba kham paka uba dei ruh u ophisar ka tnad Custom, kumjuh ruh ha Mawphlang bad ha Nongthymmai,” la bynrap biang u Bah Pala.
“Ngi don bun ki kyrtong kiba kynsai don na ki kiba la don ka jingtbit kum ki engineer, ki director bad ruh ki nonghikai. Hynrei ka shong ruh ha ki kyrtong bad ka jingtrei shitom jong ki.”
