Shillong, Nohprah 23: U President ka BJP u Bah Ernest Mawrie ha ka sngi Thohdieng u la kob ba ka BJP kan pyni ïa ki kam pynroi kiba na bynta u paidbah tang hapoh ka 100 sngi hadien ba ka shimti ïa u lakam synshar.
U la ong ba ki paidbah kin ïohi ïa ki kam pynroi kiban dei ki jingmyntoi ïa ki hi tang ha ki khyndiat sngi kiba ka BJP kan synshar bad dei ha kata ka por ba ki paidbah kin lah ban biehar ruh ïa ki nongrim ka BJP.
U la ong ruh ba ki kam pynroi kiba ka BJP kan wanrah ha ki san snem kin ïa ryngkat bad ki kam pynroi kiba ki sorkar kiba la synshar ha kine ki 50 snem ba la leit.
“Ki paidbah ka jylla ha kine ki snem kiba la leit ki la ailad ïa ki sorkar bapher bapher da ka jingkyrmen ba kin pynurlong ïa ki jingangnud kaba ki don hynrei kine ki nongsynshar ki wan phon ïa ki paidbah da ki ktien jali jaum shisen ha ka san snem hynrei ha kane ka kynti kaba mynta ki paidbah ki la sngewthuh shai kdar ban pynshong nongrim ym shuh tang ha ki jubanlak elekshon ki party hynrei ïa ki kam bad ki jingtrei kaba ki party ki la leh. Ki paidbah mynta ki la ïohi ba kaba pyndep ïa ki jubanlak kiba ka khlei sha u paidbah dei tang ka BJP” u la ong.
U la ban ruh ba ki kam pynroi kiba don ha ka jylla ha kine ki san snem kiba la leit ki dei beit ki skhim ba mang da ka sorkar pdeng watla ka sorkar jylla bunsien ka kam trai ba ki dei kiba la mang da maka da kaba pynkylla kyrteng ïa ki skhim.
Shuh shuh u la ong ba ki paidbah ki la ngiah la kdang ïa ka bamsap kaba la jur ha ka jylla bad ong ruh ba dei tang ka BJP marwei ka party kaba shung thlongmluh thlongsying ïa ka bamsap.
“Namar kim ïoh daw ban kynnoh bamsap ïa ngi ki pyrshang ban ïalam bakla halor ka niam ba ka BJP ka long pyrshah ïa kita kita ki jingngeit niam hynrei kane ka dei ka buit shukor kaba ki paidbah kim dei ban ngop,” u la ong.
U Bah Ernest u la kyntu ïa ki paidbah ba ki dei ban long kiba stad ban kiba sian haba ki jied nongmihkhmat namar lada bakla jied kan long ka jingduhnong hi ïa ka lawei jong ki.
“Ki paidbah kim dei ban jied ïa ka 5,000 kaba ki ïoh shisien ha ka san snem hynrei ki dei ban jied ïa ki kam pynroi,” u la kyntu ïa ki paidbah.
