Lah duh ka Tariang FC ha ka phainal ha Pdengshakap

Jowai, Ïaïong 10: Ka Dorbar Shnong Pdengshakap kaba pynïaid ïaka jingïaleh kai phutbol jong ka ïa kaba la tip kum ka ‘8th Secondary School Invitation Football Knock-out Tournament 2021-2022’ ha kane ka sngi saitjaiñ kala poi noh sha ka jingïalehkai (Final) hapdeng ka Tariang FC pyrshah ïaka Nohron FC.
Ha kane ka jingïalehkai phainal ka Tariang FC kala lah ban pynliem noh ïaka Nohron SC da 2-0 bad ïa kine ki arkol jong ka Tariang FC la ïoh ban thep da u Badon Marbaniang haka minit kaba 18 bad ïaka kol kaba ar pat la ïoh ban thep da u Batip phar Swer haka minit kaba 69.
Ïa kane ka jingïalehkai phainal la wan ban pynhap pyrda da u bah Lahkmen Rymbui myntri ka sorkar Meghalaya kum u kongsan, ha ka jingdonlang u bah Hering Shangpliang Professional Coach kum u symbud kongsan, u bah Gillroy Tariang MDC ka thaiñ, u bah Donkupar Moksha SDPO Amlarem, u bah Dapmon Tariang General Secretary ASSA bad kiwei kiwei ki riew rangbah jong ka thaiñ.
Ha kane ka lympung ïa ka nam Man of the match la ïoh ban rah da u Debinroy Nongspung naka Tariang FC bad ïaka nam Best Goalkeeper la ïoh ban rah da u Aibormiky Suchiang naka Tariang FC.
Na ka liang ka kynhun ïalehkai jong ka Tariang FC kaba long ka lahduh kala ïoh ban khur ïaka song pisa kaba T.2,2,0000 (Ar lak ar phew hajar tyngka) ryngkat bad ka trophy katba ka Nohron SC pat ka team ba shah rem kala ïoh T.1,30,000 (Shi lak lai phew hajar tyngka) ryngkat bad ka trophy.