Plie u ma Lahkmen Rymbui ïa ar tylli ki mawnongrim shna surok ha Pdengshakap
![](https://mawphor.com/wp-content/uploads/2022/07/mawphor-1.jpg)
Jowai, Nohprah 21: U myntri ka kam pohïing jong ka sorkar jylla u ma Lahkmen Rymbui hynnin ka sngi ula buh mawnongrim ban siang rong ïa ka surok Amlarem-Pdengshakap shaduh Muktapur bad plie paidbha ïa u mawnongrim jong ka surok ba la dep shna na Pdengshakap-Trangblang bad ka surok (Internal Road) ha Pdengshakap.
Hashwa ba plie ïa kine ki ar tylli ki mawnongrim la pynlong ïa ka jingïalang ha madan ka Pdengshakap Amlarem Sub-Division ka West Jaiñtia Hills District, ba la pynïaid da u ma S. Pakynteiñ Secretary Dorbar Shnong Pdengshakap ha ryngkat ka jingwan sakhi lang jong ki paidbah ka shnong.
Na ka liang u bah B.W Phira SE Pwd roads Jowai Circle Jowai ula pynsngew ba ïa kine ki ar tylli ki project shna surok ki kynthup Amlarem-Pdengshakap-Muktapur ha ka jingjrong kaba 14.60 km kaba kot 22 klur tam la bei pisa da ka Central Road Infrastructure Fund bad kane ka pisa ka dei kaba la lum khajna na ki paidbah na manba thep ïa ka petrol, Diesel ha kylla ka Ri India.
Katba ïa u mawnongrim shna surok na Pdengshakap-Trangblang ha ka jingjrong kaba 4.60 km ha ka jinglut kaba 4 klur bad ka surok Pdengshakap (internal road) kaba jrong kumba 2.90 haka jinglut kaba 2 klur, kine baroh ar ki wan na ka Rural Infrastructure Development Fund (RIDF) XXVII (27) lyngba ka NABARD kaba dei peit ïa ka jingïarap pisa ban pynkiew jong ka rep ka riang.
Na ka liang u kongsan ma Lahkmen Rymbui haba ai jingkren ula pynsngew ba ka jingplie ïa kine ki mawnongrim ban shan surok bad kiba la dep shna kan long ka jingkyrkhu ïa ki paidbah jong kane ka thaiñ bad khamtam ïa u surok shaduh Muktapur bala dep sanction naduh ka 30 March 2022 ka ban shna da ka PH Construction ha kaba ka kam kan sa sdang noh shen. Lyngba kane ka surok kan ïarap ban pynpoi ïa ki mar rep bad kan pynkiew ruh ïa ki kam jngohkai pyrthei ha kitei ki jaka khappud.
Ula ong ruh hadien ba la ïoh ïa ka Amlarem Civil Sub Division dang mynta hi ba ka sorkar kala ïoh ban pynkiew ïa ka Jaraiñ PHC sha ka Sub Divisional Hospital kaba don haduh 50 jingthiah, ïa ka Dispensary ha Padu yn pynkiew noh sha ka Urban Health Center.
Ula pynsngew ïa kawei ka skul kaba don ha Umladkhur la dep sanction haduh 45,79,99.000/- ïa kaba yn hap ban pyndep hapoh 30 bnai. Shuh shuh ula pynsngew ïa kiwei de ki kam pynroi kiba la wnarah hapoh ka Constituency naduh ki surok, ki umbam umdoh, ki skul bad kiwei de.
Kiwei de kiba ïa donlang ha kane ka sngi ki kynthup ïa u Dolloi ka Elaka Satpator D. Lakasiang, u Rangbah shnong Trangblang ma R. Pohdweng, ka SDO Amlarem Sub Division kong Y.R. Mawlong, MCS, nalor kiwei kiwei de, la pynshong shit shuh shuh ïa kane ka sngi da ki jingrwai bad jingshad na ki khynnah skul ka Pdengshakap Secondary School, U P School, katba ïa ki kyntien ai khublei la ïoh na u Er. R.D Pakynteiñ EE PWD Road South Jowai Division Jowai.