Mairang, Nohprah, 21: U Lamphang ka Ïingdorbar Thaw Aiñ ka jylla, u Bah Metbah Lyngdoh, u ba long ruh u MLA ka thaiñ hynne ka sngi u la leit ban plie ïa ka ‘Pig Multiplier Farm,’ kaba long ka jaka ri sniang jong ka tnat ri jingri ka sorkar jylla ha ka shnong Mawsawa, Eastern West Khasi Hills District.
Ha kane ka sngi la sakhi ïa ka jingïadon ryngkat lang u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District u Bah W. Nongsiej, u Additional Superintendent of Police ka District, u Bah H. Kharkongor, I Director ka tnat Animal Husbandry & Veterinary, I Dr (Mrs.) A. Laloo, ki nongtrei jong ki tnat sorkar bapher bapher, ki nongïalam shnong bad ki nongshong shnong ka thaiñ.
Ha ka jingkren ka jong u kum u kongsan, u Lamphang ka Ïingdorbar Thaw Aiñ ka jylla, u Bah Metbah Lyngdoh u la pynpaw ïa ka jingsngewkmen kaba khraw ban ïoh plie ïa kane ka jaka ri sniang (Multiplier Pig Farm), ka projek kaba la urlong lyngba ka jingïatreilang jong baroh kiba ïadei kam kum ka tnat Animal Husbandry & Veterinary, ka tnat PWD bad kiwei kiwei, u Sordar ka shnong Mawsawa, ki trai jaka bad ki nongshong shnong ka Mawsawa. U la ong ba kane ka jaka ri sniang ka dei kawei na ki jingpyrshang jong ka sorkar, ban kyntiew shuh shuh ïa ka roi ka par jong ki paidbah, kiba shong ha ki thaiñ nongkyndong lyngba ka kam ri jingri.
U Bah Metbah u la kren ruh halor kiwei pat ki shlem treikam jong ka tnat Animal Husbandry & Veterinary hapoh Eastern West Khasi Hills District, kiba kynthup ïa ka Vocational Training Centre kaba don ha Mawnai bad na kaba ki nongshong shnong ka jylla ki la ïoh jingmyntoi shikatdei eh lyngba ki jinghikai ba ju pynlong hangtei halor ka kam ri sniang, ri syiar bad kumta ter ter.
Ha kane ka sngi, u kongsan u la ïoh ruh ban sam ïa ki khun sniang bad ki khun syiar hapoh ka skhim Rural Backyard Piggery & Poultry Scheme sha ki nongïoh bynta kiba la ïa wan sha kane ka prokram.
Kiwei kiwei pat kiba la kren ha kane ka sngi ki kynthup ïa u Syiem ka Hima Nongkhlaw, u Pa’iem P.M Syiemlieh, u Deputy Commissioner ka Eastern West Khasi Hills District u Bah W. Nongsiej, I Director ka tnat Animal Husbandry & Veterinary, I Dr (Mrs.) A. Laloo, u Sub- Divisional Veterinary Officer, Mairang, u Dr. D. Lywait bad u Sordar ka shnong Mawsawa Bah Loving Star Mawlong.
