Nongstoiñ, Nohprah, 21: U Deputy Commissioner ka West Khasi Hills Bah Garod LSN Dykes, u la pynjari da ka kyndon 144 CrPC ha baroh kawei ka District, ba la khang pyrshah ïa ka jingtreikam beaiñ jong ki karkhana coke ki bym pat ïoh jingbit.
Ka Ïingkashari Meghalaya High Court dang shen ka la hukum ïa u Chief Secretary ban khang khyrdep ïa ki karkhana coke kiba treikam beaiñ ha West Khasi Hills.
Katkum ka hukum ka Ïingkashari la pyntip ba ki don haduh 16 tylli ki karkhana coke kiba treikam beaiñ hapoh West Khasi Hills District. Ka Kashari ka la bthah ban khang khyrdep mardor ïa kine ki karkhana naduh ba mih ka hukum, kaba mih ha ka 16 tarik u Nohprah.
Halor kane ka hukum, u Deputy Commissioner ka District, u la pynjari ïa ka kyndon ba la khang pyrshah ïa ka jingtreikam jong kine ki karkhana kiba beaiñ. U la ong ba kane ka hukum kan treikam mardor haduh ban da pynbna da kumwei pat.
