Shillong, Nohprah 20: Shwa ba ka Election sha ka ïing dorbar thawaiñ ka jylla kan long ba u bnai Rymphang 2023, kin dang don sa 11 ngut ki MLA ki ban dang hap ban hiar shuki tang shu la pynbna ka Election Commission of India (ECI) ïa ka tarik ban long ka election.
Namar ki MLA kiba thmu ban ïa khun ïa ka elekshon na kiwei ki party ki hap ban hiar shuki shuwa ba kin thep kyrteng ban ïakhun ïa ka election. Ki MLA kin hap ban ïehnoh ïa ka kam kum ki dkhot ka ïing dorbar thawaiñ ka jylla namar kin ïa khun noh na kiwei ki party .
Ki ban dang hap hiar shuki kumba la paw kat haduh mynta ki long u Bah Reniktone L Tongkhar ba la jop na ka HSPDP bad khreh ïakhun na ka UDP, u bah Meralborn Syiem, bah Shitlang Pale, bah Process T Sawkmie kiba la jop na ka party Congress bad pynkhreh ban ïakhun na ka UDP .
U Bah Samlin Malngiang ba la jop na ka party HSPDP bad khreh ban ïakhun na ka NPP, bah Kimfa S Marbaniang ba la jop na ka party Congress bad pynkhreh pat mynta na ka NPP, bah Hamletson Dohling bad bah Jeson S Sawkmie kiba la jop na PDF bad khreh ban ïakhun na ka NPP.
U Esmatur Mominin bala jop na ka NPP bad khreh ban ïakhun na ka BJP, u bah Adlebert Nongrum bala jop na ka KHNAM u ban leit sha ka party VPP, u Samuel M Sangma bala jop kum u kyrtong shimet ba la pynïasoh sha ka BJP kum u Associate member u hap ban hiar shuki.
