Ki longkmie kin ym biej ïa ka 1000 tyngka ka TMC : Sawkmie

0

Shillong, Nohprah 20 : Wat la ka All India Trinamool Congress (AITC) ka pyrshang ban phon ban pah ïa ki longkmie da ki buit sianti jongka hana ban ai skhim sha ki longkmie 1000 tyngka shibnai kata ruh hadien 100 sngi ba kan ïoh synshar lada ka wan ha ka bor, u MLA ka Mawlai u bah Process T Sawkmie u la ong ba ki paidbah khamtam ki longkmie kin ym biej ïa katei ka jingpynbiej jong ka AITC namar ki kwah ïa ka roi ka par ha ka jylla.
Haba kren bad u nongthoh khubor u la ong “ Nga da sngew lyngngoh ïa ki polisi treikam kane ka party haba tang suhthied ruh kam pat suhthied bha ha Meghalaya ki la nud ban kular 1000 tyngka lada ki ïoh ban synshar. Kiba bun ki longkmie kiba pli ki shah ïalam bakla namar ki dang pyrkhat ba katei ka 1000 tyngka kin ïoh naduh mynta na kata ka daw ki ïa beh ban rejister ïa kata ka WE CARD hynrei ki dei ban kynmaw kam long kumta kane ka jingkular ka long tang lada kane ka party ka ïoh ban synshar kata ruh haduh hadien 100 sngi lada ka long ruh. Kumta nga kyntu ïa ki longkmie hi ba kin bishar bniah bha ym ban shu shah pynbiej ne shah ïalam bakla ha kum kine ki party kiba tang shu ïoh phrung khlieh ha ka jylla ki la kob lypa”.
U la ong ba wat kiwei kiwei ki National Party kiba heh kiba la synshar ha ka ri kum ka Congress bad ka BJP ruh kim pat nud ban kob kumne katba kane ka TMC kaba dang synshar tang ha West Bengal ka la nud ban kob bad khlem pep kine ki dei tang ki jingkular election bad hadien ka election kine ki jingkular kin shu jah rngai bab kin ym paw pyrthei shuh.

Leave A Reply

Your email address will not be published.