Pynrem jur ka Synjuk ki RS Ri-Bhoi ïaka jingdawa ban ithuh ïaki Rangbah Shnong Garo ha Ri-Bhoi

Nongpoh, Nohprah 20: Ka Synjuk ki Rangbah Shnong, Ri-Bhoi District mynta ka sngi kala pynrem jur ïaka jingdawa jong ki paid Garo khamtam ka kynhun bala tip kum ka All Ri-Bhoi Garo Headman Association kiba la mih paidbah hynnin ka sngi haka shnong Rangsakona kiba la pynpaw ïa ka jingpyrshah halor ka jingthmu ka Hima Mylliem ban pynduh bor ïa ki Rangbah Shnong jong ki Shnong Garo ha Ri-Bhoi District bad halor katei ka bynta naka liang ka Synjuk ki Rangbah Shnong Ri-Bhoi kila ai syndon da ka jingthoh sha u DC ka Ri-Bhoi ban pyrshah ïaka jingdawa jong ki paid Garo.
Haba kren sha ki lad pathai khubor mynta ka sngi hadien ka jingïakynduh ïa u DC ka Ri-Bhoi u Bah PB Sylliang General Secretary ka Synjuk ki Rangbah Shnong Ri-Bhoi District, haka jingdonlang u Bah BB Makdoh Chairman bad kiwei ki nongïalam, u la ong ba kum ka Synjuk kam ithuh satia ïa katei ka kynhun jong ki Rangbah Shnong Garo bad pynrem jur ruh halor ka jingmih paidbah jong ki hynnin ka sngi ban pyrshah ïa ka Hima Mylliem kaba la thmu ban pynduhbor ïa ka iktiar ki rangbah shnong jong ki jaid bynriew Garo ba shong basah ha them Ri-Bhoi.
U la ïathuh ruh ba kum ka synjuk kala ioh ruh ka jingujor naki nongïalam shnong ka Them Marwet halor ka jingleh donbor jong ki katto katne ngut ki Rangbah Shnong Garo, bad la shem ruh ba kila don ki Rangbah Shnong Garo kiba don bynta haka kam die beaiñ ïaki jaka puta da kaba shim kabu ban pyndonkam bakla ïaka muhor Rangbah Shnong kaba la pynlong ruh ïaka jylla ban duh bun tylli ki jaka ha katei ka thaiñ.
Naka liang u Bah PB Sylliang u ba ong ruh ba ki don ki Khasi kiba ioh lok Garo bad ki don ruh ki Garo kiba ioh lok Khasi, bad lada ailad ïa u Garo ban long Rangbah Shnong, ki Khasi ruh ki lah ban long Nokma ha Garo, hynrei kum ka Synjuk kam kwah baka riti ka dustur kan kylla kumba la buh naduh mynbarim, bad katkum ka Mylliem Act la kren shai ba ki Rangbah Shnong ki dei ban long tang ki Khasi kiba la biang ka rta bad haki shnong ba don ki Garo la ailad ban long tang ki nongpeit nongkhmih ban pynïaid ïaka Shnong ym ki Rangbah Shnong.
Shuh shuh halor katei ka bynta naka liang ka Synjuk kan sa leit ruh ban kynduh ïa u Syiem ka Hima Mylliem bad kumjuh sha KHADC ban ïakren halor katei ka mat ba ym dei satia ban ithuh ïaki kot ki sla ba soi da ki Rangbah Shnong Garo.