Khliehriat, Nohprah 17 : Ka Khasi Students Union Wapung Unit myn ha ka 16 tarik mynta u bnai nohprah ka la pynkup burom ïa ki samla pule kiba pass bha shakhmat ha ka exam SSLC,HSSLC bad Bachelor Degree, Master degree bad iwei iba la pydep ïa ka jingpule doctor da ka 3rd Who Tep Kyndait Acadamic Award bad kane ka KSU Wapung Unit ka kynthup ïa ki san tylli ki shnong, ka Wapungskur, Wapung Shnong, Tuber Kmai Shnong, Tuber Shohshrieh bad Mookhep.
Kiba la ïa don lang ha kane ka sngi ki kynthup u Education Secretary jong ka KSU Central Executive Council u bah Raymond Kharjana, u bah Damewanhi Rymbai, uba dei u kyrtong u ban ïakhun ïa ka Assembly election na Khliehriat Constituency, u President ba rim jong ka KSU Jaiñtia Hills Unit, u bah Ohibait Dkhar , u General Secretary KSU East Jaiñtia Hills District, u bah Kwilnis Suchiang, u Vice President KSU East Jaiñtia Hills, u bah Satly Ryngkhlem, u Finance Secretary KSU East Jaiñtia Hills District, u bah Shaniahskhem Dkhar bad ki nongïalam shnong kiba na ka shnong Wapung Shnong bad Wapung Skur.
Kum ban shu pashat jingtip halor ka khana lyngkot shaphang u woh Tep Kyndait, la ong ba u dei u wei na ki khlawait ka ri lum Jaiñtia uba na ka shnong Tuber Kmaishnong, u dei u wei uba la ieng pyrshah ïa u Syiem Jaiñtia uba kyrteng u Amratap Sing namar ba une u syiem u la phah kylla niam Hindu ïa baroh ki khun ki raiot ka ri lum khat ar Doloi.
U tei u syiem u la phah da u syiem khynnah jong u, u Rapo Ram Sing ban ïaleh pyrshah ïa u Tep Kyndait ha kaba ki la ïaleh da ka thma ba la khot ka thma Nongsyntoiñ ha u snem 1669 bad ha kane ka thma u woh Tep Kyndait u ka pynrem ïa u syiem khynnah.
Hynrei, ha ka por ba ïakren iasuk hapdenga u woh Tep Kyndait bad u Syiem ka human Jaiñtia, une u Syiem u la pyniap ïa u woh Tep Kyndait.
Kumta kum ka dak ka jingkynmaw burom ïa utei u khlawait, ka Seiñ Raij Tuber ka la tei nam da u mot sah jingkynmaw uba don mynta ha shnong Tuber Kmai Shnong.
Kumjuh ruh, ka Khasi Students Union Wapung Unit, ka shim ia ka synjam ban kynmaw burom ia utei u khlawait ka ri, da kaba pynlong ia kane ka Woh Tep Kyndait Acadamic Award kaba ka seng la pynlong mynta la lai snem kynthih.
