Ngim kwah shuh ba ki paidbah kin dang long langkñia kumba jia ha Mukroh, ka sorkar ka dei ban shimkhia mardor

Nongpoh, Nohprah 15: Ki nongïalam ka KSU mynta ka sngi kila leit ban ïakynduh syndon ïa u Deputy Commissioner ka Ri-Bhoi District u Arpit Upadhyay halor ka jingbteng jong ka Assam ban pynibor haka shnong Umsaw Lum Dorbar jong ka thaiñ Block II ban ujor halor ka jingker sainar jubor ka Assam ha katei ka shnong da ka tnad Forest jong ka Assam bad dawa ruh naka sorkar ba ka dei ban shimkhia mardor shuwa ban jia kiei kiei namar kum ka seng kam kwah shuh ba ki paidbah kin dang kylla langkñia kumba jia ha Mukroh, kumba ki pulit Assam ki dang thwet ïaki paidbah bad nongïalam shnong haduh mynta.
Ha katei ka jingleit kynduh ïa u Deputy Commissioner ka Ri-Bhoi haka jinglam khmat da u Bah Ferdinald Kharkamni President ka KSU North Khasi Hills District, u Samla Banjop Maring Presiden ka Eastern Border Area bad kiwei ki nongïalam kila kren shai sha u DC ba u dei ban shimkhia ïa katei ka kam ba ki paidbah ha katei ka shnong kin nym shong syier.
Haba kren sha ki lad pathai khubor hadien ka jingïakynduh ïa u DC, u Bah Ferdynald K Kharkamni, u la pynpaw ïa ka jingsngewkhia kaba jur ba naduh ba la jia ka jingjia ha ka shnong Umsaw Lumdorbar mynta kumba 2 taiew eiei namar ba kam shym la don kano kano ka jingshimkhia na ki bor pynïaid district bad ka sorkar ban leh eiei halor katei ka jingjia bad kane ka la nang buh hapdeng ka jingshongsyier ïa ki paidbah nongshong shnong ha katei ka shnong.
U la ïathuh ruh, ba dei hadien ba ki nongïalam ka seng ki la leit sha ka shnong Umsaw Lumdorbar ba ki la lap shisha ba ki bor ka Assam lyngba ka tnad Forest ka la leh donbor da kaba wan kam jubor khlaw ha katei ka shnong bad leit ban ker sainar jubor wat hapdeng ka jingpyrshah jong ki paidbah nongshong shnong kiba la buh ruh ka jingujor ha Mawlasnai Police Outpost, hynrei khlem kano kano ka jingpatiaw ka tnad Forest jong ka Assam kila leit ban ker kynroh syndon kaba la pynlong ïaki paidbah ban bitar bad pynpra syndon ïa katei ka jingker jong ka Assam.
U la ïathuh ruh ba u snem 2005 naka liang ka tnad Forest jong ka Assam kila leit ruh ban thang ïa kumba 32 tylli ki longiing jong ki khasi ha katei ka shnong, hynrei mynta ka Assam kala sdang ban pynibor biang da kaba ker syndon da ki jingker ha katei ka shnong ba hadien ka jingpynpra jong ki paidbah naka liang ki pulit ka Assam kila pyrshang ban thwet bad ban kem naphang kaba la buh ïaki paidbah hapdeng ka jingsyier kaba khraw bad kumba kadei ka por ot bad por lum ïa u kba bad ki mar rep jong ki, hynrei ki paidbah kim nud shuh ban mih namar ka jingthwet ki pulit Assam kaba lah ban buh jingma ïaki.
U la ong ba halor ka jingker ka Assam haka shnong Umsaw Lumdorbar ka sorkar jylla kala dei ban phah kem ïakiba donkti ha katei ka kam, wat hapdeng ba ki 2 jylla ki dang don hapdeng ka jingpynbeit pud namar ka Assam ka ju pyni bor naka por shaka por bad pynkheiñ ïaki soskular jong ka jingpynbeit pud.