Bteng ka Sorkar Assam ban kyntur pud ha Umsaw Lumdorbar, shong syier ki paid Khasi

Nongpoh, Nohprah 14: Ki paidbah nongshong shnong ha khappud ka Block II, ha ka shnong Umsaw Lumdorbar ki hap ban shong hapdeng ka jingtieng ka jingsyier kaba dei na ka jingbteng ki pulit ka Assam ban pynibor bad ban thwet ruh wat ïa ki nongïalam shnong, kaba dei hadien ba ka jingker sainar ka Assam ba la wan kyntur pud sha ka khlaw shnong ka Umsaw Lumdorbar la shah pynpra noh ha kine ki khyndiat sngi.
Halor kane ka jingkyntur pud ka Assam lyngba ka tnad forest, ki nongïalam Shnong ka Umsaw Lumdorbar ki la dep ban ujor sha ki Pulit ka Mawlasnai Police Outpost bad ruh la wan ban jurip da u Border Magistrate naduh ba la wan ker sainar da ka Assam bad kumba long haduh mynta ka Assam ka la lah ban pyndep ban ker sainar bad na ka liang ka bor district bad sorkar Meghalaya kim shym la lah ban leh ei ei, ha kaba ki bor sorkar ka Assam khamtam ki pulit ki bteng ban pynibor bad ban pynthud ïa ka shongsuk shongsaiñ ki paid Khasi ha katei ka Shnong Umsaw Lumdorbar.
Haba ïa kren halor kane ka bynta, kane ka shnog Umsaw Lumdorbar ka don ha Block II bad haduh mynta ki ar sorkar ka Meghalaya bad Assam ki dang don ha ka lynti ban ïa pynbeit noh ïa ki kam pud ki kam sam, hynrei kaba ei kaba la pynpaw ka jingsngewkhia da ki paid Khasi ka dei ka jingshah thombor ha ki Pulit ka Assam kiba la kam ba katei ka jaka ka dei ka Assam wat lada ka jingpynbeit pud kam pat dep satia.
Kumba la ïathuh da u Rangbah Shnong ka Umsaw Lumdorbar, u Bah Paul Star Lyngdoh, la ong ba dei ha ka 11 tarik mynta u bnai, ki paidbah da jingbitar ki la leit ban pynpra ïa katei ka jingker sainar ka Assam bad ki pulit ka Assam pat ki la kynnoh ba la leh da ki nongïalam shnong bad ki pyrshang ban thwet bad ban kem ïa ki nongïalam khlem da da lap ka jingshisha mano ba la pynpra ïa katei ka jingker sainar ka Assam.
U la ïathuh ruh kaba kham jynjar shuh shuh ka long ïa ki nongrep, namar katei ka khlaw ka dei ka jaka rep jong ki paidbah, ha kaba mynta ka la dei ka por lum por lang ki mar rep ki la shu sah ha ki jaka rep, namar ki nongrep kim nud ban leit lum leit lang ba ki Pulit ka Assam ki byrngem ban kem naphang ïa ki paidbah.
Da kaba bynrap ruh halor kane ka jingshong syier ki paidbah ha katei ka shnong khappud, u Bah Paul Star Lyngdoh u la ïathuh ba ka jingpyntip ne ujor sha ki bor district bad bor sorkar ka Meghalaya kam myntoi ei ei bad haduh mynta kim shym la leh ei ei halor kane ka jingker sainar ka Assam bad u la kynnoh ruh ba ka sorkar Meghalaya kam kyndit bynriew katba ym pat jia kumba la jia ha Shnong Mukroh haduh 6 ngut ki mynsiem ba kordor ki la duh ïa ka ka jingim khlem da dei por, u la bynrap.
Lada ka sorkar Meghalaya ka dang leh kyllut halor ka jingeh bad ka jingshong syier ki paidbah ha katei ka shnong khappud, u Bah Paul Star Lyngdoh u la ong ba ma ki ruh kim banse ban shim da kawei ka lynti lada dei ban jia kumba jia ha ka shnong Murkroh, nam ar kum ki paidbah Khasi kim lah shuh ban shah ïa ki kam thombor ki Pulit ka Assam kiba ju leh donbor na ka por sha ka por, u la bynrap shuh shuh.
Na ka liang u khlieh nongïalam ka KSU, u Bah Lambok Starwell Marngar haba kren mynta ka sngi halor kine ki kam thombor ka Assam bad ki Pulit ka Assam, u la byrngem syndon ïa ka sorkar Meghalaya bad sorkar Assam ba ki dei ban pynsangeh ïa kine ki kam thombor ki pulit ka Assam ha kitei ki shnong khappud bad lada jia ba ki paradoh ki parasnam ki dang shah thombor ka seng KSU kan nym kren shuh da ka ktien bad kam banse ban leh noh da ka kam.
U la ong ruh ba ka seng KSU kam kwah ban jia kumba la jia ha ka shnong Mukroh bad ka la dei ka por ba ki hap ban pyni noh da ka kam bad lada jia ei ei kaba snngewsih ka sorkar Meghalaya bad ka sorkar Assam ki hap ban shim ïa ka jingkitkhlieh, namar kumba long haduh mynta ki pulit ka Assam kin nym lah ban kam trai ïa katei ka jaka kaba dang don hapdeng ka jingïapynbeit bad lada ki paid Khasi hi ki dang shah pynthud ban shah thombor ha ki Pulit ka Assam ka seng KSU kam banse ba shim da kawei ka lad ka lynti, u la ong.
Shuh shuh, kum u nongïalam u la ong ruh ba ki paidbah ki da rit mynsiem shisha namar ka sorkar Meghalaya haduh mynta kam lah ban ai ka jingïada bad kam lah ruh ban buh ïa ki bor pulit ban pahara bad dei tang ki pulit ka Assam kiba ju leh donbor bad ki pyrshang ruh ban shim kabu namar ka jingjem palat ka sorkar Meghalaya kaba ym ju pynibor ïa ka sorkar wat lada ka tur bad dakhol ïa ki jaka jong ka Meghalaya, u la bynrap.