5 tylli ki projek pynbna u CM ha Pyrursla kynthup ïa ka Mini Secretariat bad PWD Division

Shillong, Nohprah 13 : U Myntri Rangbah ka Jylla, Conrad K Sangma dalade hi u la hiar sha Pynursla ban leit pynbna ïa ki san tylli ki projek kiba heh ba heh na ka bynta katei ka constituency bad ruh na bynta katei ka them riwar baroh kawei.
Kitei ki projek kiba u Myntri Rangbah u pynbna ha katei ka sngi ryngkat ka jingdonlang u Symbud Myntri Rangbah ka Jylla ba dei ruh u MLA ka thaiñ Bah Prestone Tynsong, nangta u Myntri ka tnad Transport, Bah Dasakhiat Lamare, ki kynthup ïa u mawnongrim ban tei noh ïa ka Mini Secretariat, nangta ïa ka Ophis treikam ba thymmai jong ka C&RD Block, ban tei ïa ka skul ba pawnam ha ka ri, ka Ekalavya Model Residential School, ka football stadium ha Wahlyngkhat, nangta ïa ka Pynursla Division jong ka PWD Roads bad ruh ka jingpynbna ïa ka Riwar College kum ka People’s College ne ka College kaban kyrshan lang da ka sorkar.
Ha katei kajuh ka sngi, u Myntri Rangbah bad u Symbud Myntri Rangbah ki la sam ruh ïa ka song pisa kaba 33.40 lak tyngka lyngba ka FOCUS+ sha ki 668 tylli ki longiing, nangta 11.36 klur tyngka sha ki 950 tylli ki SHG bad 80 tylli ki Village Organisation.
La sam ruh haduh 2000 tylli ki khun sniang sha ki 400 ngut ki nongïoh jingmyntoi, bad ruh ka jingsam ïa ki khun syiar kuroiler ba bha jait sha ki 100 ngut ki nongïoh jingmyntoi ha katei ka jingïalang kaba heh bha kaba long ha madan Pynursla.
Shwa kane u Myntri Rangbah u la ai ka jingïaroh ïa ka jingaiti lut met bad mynsiem jong u Bah Prestone ban trei na ka bynta ka jylla ym dei eh tang na ka bynta ka Pynursla consituency. U la ïaroh ruh ïa ki nongthep vote kiba la pynjop ïa u kum u nongmihkhmat uba don ka bor bad ka jingïohi jngai ban trei na ka bynta ka bit ka biang jong ka jylla baroh kawei.
U ong ruh ba ka jingwanrah jong ka sorkar ïa kitei ki prokram bapher bapher ka long beit tang da kawei ka thong kata ban ai ïa ka roi ka pa bad ka jingmyntoi na ka bynta ki nongshong shnong ka jylla.
Katba na ka liang u Bah Prestone pat u la pynpaw ka jingsngewsih ban ïohi ba kat kaba u kren ne leh la pynkylla khongpong lut. Hynrei la katta ruh u ong ba um sngew ei ei namar ka thong jong u ka long beit tang ban ai ka jingshakri kaba paka tam na ka bynta ka roi ka pa jong ka jylla ym tang ha Pynursla hynrei ha ki 59 tylli ki constituency jong kiwei pat ki nongmihkhmat.
“Hynrei lada phi kwah ban shna drama shna katba mon namar ka sah mynta sa tang ar bnai ba ki paidbah kin sa ai ïa ka jubab,” u la bynrap shuh shuh.
Da kaba pynkynmaw ba ka jingkynthoh ïa u kadei kaba la palat pud bad ka bym long shuh ban ïakren, u Bah Prestone u la ong ba ki paidbah ka thain Riwar la slem bha ki la kwah ïa ka jingkylla, kaba baroh ki la urlong lut ha katei ka sngi la ka long naduh ka Community College haduh ki kam pynroi bapher bapher.
U ong ruh ba lada ki paralok kim pat hun ban tah sia lieh sia iong ïa u bad ruh ïa u Conrad naduh u Kyllalyngkot kin sa ïohi ba ka kam kan sa ïaid shaid shaid ha baroh kawei ka jylla. Nalor ki heh sorkar na ki tnad bapher jong ka sorkar jylla la donlang ruh ha kane ka sngi naduh ka MDC jong ka Nongshken Kong Grace Kharpuri, MDC Mawphlang Bah Lamphrang Blah nalor ki phew hajar ngut ki paidbah nongshong shnong na katei ka thaiñ.