Ngam tieng ïa ka jingsam pisa, ka dei ka jingtynjuh ïa ki paidbah, ong u kyrtong VPP

Shillong, Nohprah 13: Wat lada ka lyer ka beh kyrthep ba ka jingsam pisa ban khring ïa ki nongthep vote ha kane ka elekshon kan jur bha, hynrei u Kyrtong ka Voice of the People Party (VPP) na Mawryngkneng, u Bah HS Kharpran, um tieng satia, da kaba ong ba ka jingsam pisa ha ki por elekhon kadei ka jingtynjuh ïa ki paidbah.
Haba ïakren bad u nongthohkhubor, u Bah Kharpran, u la ong ba ka VPP ka leit kylleng kylleng ban ïalap bad kren pyrshah ïa ka jingtheh ne sam pisa por elekshon bad kane kadei ka thong kaba ka Seng hapoh ka jingïalam u Bah Ardent ka buh hakhmat. Ki paidbah kidei ban sngewthuh bad ban kylla noh ka jingmut jingpyrkhat ba ka pisa por elekshon hi kam wanrah ka roi ka par bad kam pynpoi shano shano ruh. “Nga kynmaw ba kumba arphew snem eiei mynshuwa ym ju ïoh sngew ïa kane ka jingsam pisa por elekshon bad ki kyrtong ki leit sha ki paidbah da ka jingieit bad ynda la jop ki trei beit ïa ka kam”, u la ong.
Ki MLA ba mynshuwa jong ki jong i (L) Bah Sanbor Swell ki leit sha ki paidbah ym da kaba sam pisa, hynrei ki leit da ka jingiet bad ki jop bad haba ki jop ki trei la ka kam ban shakri bad wanrah jingmyntoi ïa ki paidbah.
“Ngi ruh kum ka VPP ngi leit sha ki paidbah da kane ka Sur bad ngim tieng lada kiwei ki theh pisa bad ai u paidbah un bishar mano ba lah ban shakri hok”, la ong u kyrtong ka VPP.
Haba la kylli la hato ka jingdon jong u ha ka kam sorkar la bun bun snem kan ïarap kumno pat ïa ka kam shakri paidbah, u Bah Kharpran, uba long u ophisar ba la shongthait na ka tnad Soil and Water Conservation, u la ong ba kum u ophisar sorkar u la trei bha bad ki paidbah namar ba ka kam kaba u trei kadei kaba ua ïadon bynta bad ki paidbah ha kaba u hap ban don bun sngi sha field. Nangta ka jingpynkylla ïa ka rukom treikam sorkar kata kaba ki ong ka bottom up approah ne ka jingmang ne jingpyrkhat ban pyntreikam ïa ki skhim da ki paidbah lyngba ki komiti na ki shnong ki thaw ka la long ka jinghikai kaba biang bha ïa u ha ka kam shakri paidbah.
Halor ki jingduna ba ka Mawryngkneng Constituency ka dang donkam, u Bah Kharpran, u la ong ba ha Mawryngkneng, kiba bun ki Shnong kidei ki jaka rep bad kumba long mynta ki nongrep ki dang donkam shibun kiei kiei bad na ka liang jong u, kum u ophisar ba ju trei ha ka tnad ba ïadei bad ki nongrep un trei na ka bynta ka jingdonkam jong ki. Nangta u la ong ba ka Mawryngknen ka dang donkam ruh ïa ki jaka sumar kiba biang ha ka koit ka khiah, ha ka pule puthi bad kiwei kiwei de bad kadei ka kamram jong u ban peit ïa kine, lada jia ba ki paidbah ki ibit ban jied ïa u kum u Nongmihkhmat ha ka elekshon MLA ha u snem 2023.
Halor ka jingjied jong u ïa ka Seng VPP, u la ong ba ka daw ka long ka dei ka Seng kaba la ïalam da u Bah Ardent Basaïawmoit, namar ba udei u nongïalam uba khuid bad u bym riej ban kren ïa ka jingshisha. Udei ruh uba la ju kren ïa ki ishu ha Assembly ha kine ki shiphew snem ba u long kum u MLA jong ka Nongkrem, kaba mut ba ka VPP ka don u nongïalam uba khlaiñ bad dei namar kane ka daw u jied ban ïakhun na ka VPP.
U la ïathuh ruh ba haba u ïaid sha ki shnong ki thaw hapoh Mawryngkneng, haba u la jan dep lut ban rung, u ïoh ïa ka jingkyrshan na ki paidbah kiba u la ïoh ban ïakynduh.