Pyni nuksa da kaba leit ïaleh kmen Khristmas bad ki Khunswet

Shillong, Nohprah 13 : Ka khlieh duh ne Chairperson jongka All India Trinamool Congress (AITC) ka pynpaw ïa ka jinglong nongïalam jongka da kaba ka burom ïa baroh ki jait niam namar mynta ka sngi ym tang ba ka la leh ha West Bengal man la u snem hynrei ka la pyni syndon da ka nuksa da kaba ka la leit ban ïashim bynta ha ka jinglehkmen Khristmas bad ki khynnah Khunswet ha ka Peace and Goodwill Concert kaba la pynlong da ka TMC ha Windermere Resort, Shillong ha ka jingïadon lang ki nongïalam ka TMC na ka jylla, ki nongialam niam, ki Rangbah Shnong, ki Waheh Shnong na kylleng ki shnong ka ri Khasi bad Jaintia.
ïa kane ka jingrakhe la sdang da ka jingduwai ba la ïalam ïa ka bynta da u Father Richard jong ka All Faith Forum bad la pynbud pat da ki jingrwai niam da ka kynhun Choir na Nagaland ka En Tribe, ka Abdiel na Mizoram bad ka KHMIH na Meghalaya.
Nalor kane ka jingrakhe, ka Mamata Banerjee kala ïa shim bynta ha kiba bun ki jingpynbyrngia bad ki Khynnah kiba wan na ki jaka ri khunswet bapher bapher.
Ka la ïakynduh ruh ïa ki Rangbah Shnong bad ki Waheh Shnong na Ri-lum Khasi bad Jaintia, ki riew pawkhmat ka imlang sahlang bad kiwei kiwei, kiba wan ban ïashimbynta lang ha kane ka jingrakhe.
Kane ka Nongïalam ka AITC kala pynmeh ruh ïa u dieng Khristmas bad ot ia u cake ban iabam sngewbha.Ka la ai khublei ïa baroh kiba wan ïashim bynta ha ka jingrakhe. “Nga ai ka jingieid bad ka jingkitbok ïa baroh ki Khynnah, ki dei ki nongkynti bad ka lawei jong ka Ri jong ngi” ong ka Mamata haba aiti ïa ki jingaisngewbha sha ki Khynnah.
Haba pynpaw ba ka dei ka burom ïa ka ban ïadon bynta ha kum kane ka jingrakhe, kane ka Myntri Rangbah ka West Bengal kala pyntip ba ka Sorkar jong ka ruh ka la pynlong ïa kum kane ka jingrakhe ha Kolkatta. “Ngan sa plie ïa ka jingrakhe Khristmas ha Park Street ha ka 21 tarik u Nohprah” ka la bynrap.
Ka la pynpaw ka jingsngewnguh ïa baroh kiba la ïashim bynta ban pynlong ïa kane ka prokram kaba phuh ba phieng.Ka la ong “ Nga kyrmen ba ka Khristmas bad Snem Thymmai kan kdew ruh ïa ka jingïaid lynti kaba thymmai. Nga kitbok ba phin ïai don ka khmat ba phuh sam rkhie. Sngewskhem ïa kaei kaba phi leh bad phin sa ïohi ba ka pyrthei ka long hapoh jong phi”.