Shillong, Nohprah 13: Hadien ka jingïamir jingmut ba tang shi taiew na ka bynta ban wad kyrtong bad wad party na ka bynta ka elekshon jied nongmihkhmat sha ka Ïing Dorbar Thawaiñ ka Jylla ha u snem 2023 ban wan da ki nongïalam bad riew rangbah na kylleng ki shnong ka Mawphlang Constituency ki bym sngewtynnad ïa kiwei ki seng saiñ-hima ha ka jingïalam u Bah Kyntiewborlang Syiemlieh, Nolandro Lyngdoh, Everson Marbaniang, Mayborn Marbaniang, Dherilang Jaba, Roystar Rani, Win Kharryngki bad kiwei pat kumba 1500 ngut eiei ha ka 12 tarik ki la shim ïa ka rai ban pynïakhun da u samla Wossie Rani na ka shnong Pyndengkhah jong ka Hima Nongspung bad ban pan ticket ruh na ka Bharatya Janata Party (BJP).
Ha ka jingïalang ha kane ka sngi ha Pyndengkhah haba la ïoh sngew ïa ki jingpynshai lyngba ki jingkren na ki nongïalam, ki paidbah ki la shim ïa ka rai ban phah ïakhun da u samla Wossie Rani bad ïa kut ruh ba kin ïatreilang bad ïa tylli na ka bynta ka jingthmu ban pynjop don burom ïa u samla Wossie. Kine ki rangbah bad nongïalam lem kiwei kiba la ai jingkren, ki la pynpaw ïa la ki jingeh ki jingïakynduh ha ki snem kiba la dep bad ka jingbym don ka roi ka par ha ka thaiñ bad Constituency hi baroh kawei.
