Jowai, Nohprah 13: Ka Mihmyntdu Community Social Welfare Association (MCSWA) mynta ka sngi kala ïoh ban rakhe ïa ka jingdap 40 snem pura ka jingshakri jong ka ïa ka imlang ka sahlang.
Ïa ka jingïalang la pynlong ha Salaroh, Jowai ha kaba u ma Brightstar Chyrmang uba dei u MDC ka North Jowai Constituency ula long u kongsan. La wan ban ïadon lang ha kane ka sngi da u Director & Founder MCSWA u ma Wilson Dohling DDTI MACS bad u ma Lambor Suchen uba dei u Skill Development Officer ka MSSDS West Jaiñtia Hills.
U kongsan haba ai jingkren ha kane ka sngi ula pynpaw ka jingsngewkmen ban ïoh lad ban ïadon bynta ha kane ka jingrakhe jong ka MCSWA ïa ka jingdap 40 snem ka jingshakri jong ka. Ula ong ba ka MCSWA kala leh shibun ki kam kiba bha ha ka imlang ka sahlang kiba la pynïoh jingmyntoi ïa kiba bun ba lang khamtam ïa ki khun samla kim bym ïoh kam ïoh jam. Lyngba jong ka MCSWA bun ki samla kila ïohlad ban ïeng hala ki jong ki kjat.
Mynta ka sngi ruh u MDC ula ïoh ban ai mynsiem lem ïa ki samla kiba la pyndep ïa ka jingai jinghikai lyngba kane ka seng. Ula ong ba da ka jinglah jong ki ban pyndep ïa kane ka training mynta kin sa lah ban ïeng hala ki jong ki kjat, khlem da khmih lynti than ïa ki kam sorkar namar ba ka long kaba eh haduh katta katta ban ïoh ïa ka kam sorkar ha kine ki sngi ba mynta.
Ha kane ka sngi u ma Brightstar ula plie ïa ka Websiste jong ka MCSWA, kham hashwa jong ka jingïalang la ïoh ïa ka jingpule Bible bad duwai da u Rev. D. Lyngdoh, ka jingkren pdiang na i Sunita Sunu, la ïoh ruh ïa ka jingrwai ïa ka Theme Song jong ka MCSWA.
La ïoh ruh ka jingkren na ka Dr. Joanietta Shullai ba dei i Director & Founder MCSWA bad ïa ka jingkren ai khublei la ai da A.J. Nongkynrih, Chief Functionary MCSWA.
La sam ruh ïa ki Mementos sha ki dkhot ka seng bad kumjuh ïa ki dkhot barim jong ka MCSWA. La sam ïa ki certificate sha kito kiba la pyndep ïa ka jingshah hikai ha ka Tailoring Course bad kumjuh ruh kiba la pyndep ïa ka piggery.
