Jop ka Lapynhun bad u Joshwa Fort ha ka jingïakop Miss & Mr South West Khasi Hills District

Mawkyrwat, Nohprah 12: Ka Lapynhun Dkhar bad u Joshwa Fort Nongsiej ki long ki ar ngut ki samla kiba jop ha ka jingïakop Miss & Mr South West Khasi Hills District kiba la rah ruh ïa ka song pisa kaba T. 15 hajar tyngka ba la pynlong da ka Seng Samla Shnong Mawkyrwat ha madan jong ka skul Nativity Mawkyrwat ha kaba kane ka prokram ka long ruh kum shibynta ban rakhe ïa ka jingdap 50 snem ka jylla Meghalaya.
Ka jingthmu ha kaba pynlong ïa kane ka jingïakop Miss & Mr South West Khasi Hills District ka long ban kyntiew ïa ki samla jong ka distrik ba kin kiew ha ki rynsan ïakop khlem jinglehraiñ ne jingtien namar lyngba ka jingshlur jong ki samla ban pyni ïa ki sap ki phong ba ki ki don kan long ka jingmyntoi ïa ki hi bad ka long ruh kawei na ki bynta ban kin ïoh ban pyndonkam hok ka jinglah jong ki ha kiba bun ki bynta. Shuh shuh ka long ruh kawei na ki rynsan ba kin ïa ithuh i thaw para ma ki bad ka ban long ka jingïa ai mynsiem kaba mar kylliang namar ha ki jingïakop ki don kiba poi sha ka thong bad ki don ruh ki bym poi. Kumta lyngba ka jingïakynduh lang jong ki kan long ka jingïarap ha kaba kin lah ban ïa syllok para ma ki ryngkat ka jingaibuit jong ki nonghikai kiba la ïoh jingpyntbit.
Ha kane sngi ka la long shisha ka jingïakop kaba shongshit bad i shongkun lyngba da ka jingwan sakhie lang da ki paidbah jong kane ka dong ka thaiñ Mawkyrwat ha kaba ki nongïashimbynta ki don haduh 14 ngut ki ‘thei bhabriew bad 15 ngut ki ‘rang kynsai kiba na kylleng jong shnong hapoh jong ka South West Khasi Hills District.
Kiwei pat ki nongjop ha ka Miss & Mr South West Khasi Hills District na ka liang jong ki ‘thei bha briew ki long ka Ibadonbok Syiemlieh ha ka kyrdan kaba ar bad ka Amanda Paleishisha Kurbah Syiem ha ka kyrdan kaba lai katba ha ka liang jong ki ‘rang kynsai ki long u Nobleson Syiemiong ha ka kyrdan kaba ar bad u Kynphamlang Nongsiej ha ka kyrdan kaba lai.
Ïa kane ka prokram la pynshongshit ruh da ki jingrwai bad ki jingshad na ki samla kiba na kylleng ki shnong kiba dei napoh jong ka South West Khasi Hills District bad kumjuh ruh ka jingpyni riam na ki hep kiba rit.
Ha kane sngi la ïadonlang naduh ka Deputy Commissioner, South West Khasi Hills District, ka kong C. Kharkongngor, IAS, ka Additional Deputy Commissioner, South West Khasi Hills District, ka kong J.U. Kharpuri, ryngkat kiwei de ki ophisar bad ki nongkitkam jong ka Seng Samla Shnong Mawkyrwat.